RÚV sala ehf., dótturfélag RÚV sem ber ábyrgð á allri sölu sem ríkisfjölmiðilinn skilgreinir sem tekjuaflandi samkeppnisrekstur, velti 2,8 milljörðum króna á síðasta ári. Rekstrartekjur félagsins voru 18 prósent hærri á árinu 2022 en á árinu 2021.
Hagnaður af rekstri RÚV sölu, það sem sat eftir inni í dótturfélaginu eftir að það var búið að gjaldfæra viðskipti við móðurfélag sitt upp á tæpa 2,4 milljarða króna, greiða laun starfsmanna og borga tekjuskatt, var 170 milljónir króna á árinu 2022. Hagnaðurinn jókst um 37 prósent milli ára.
Þetta kemur fram í ársreikningi RÚV sölu sem Heimildin hefur fengið afhentan. Þar segir áframhaldandi bati hafi orðið á rekstri félagsins á árinu 2022 og að tekjur hafi verið sambærilegar og árin á undan heimsfaraldri kórónaveirunnar. Þá séu horfur félagsins á árinu 2023 „ágætar þótt áætlun geri ráð fyrir aðeins minni tekjum, enda ekki eins mikið af stórviðburðum á árinu.“
Í samstæðureikningi RÚV, sem birtur var opinberlega fyrir skemmstu, kom fram að þorri tekna RÚV sölu hafi verið vegna sölu auglýsinga og kostanna. Þær jukust um 372 milljónir króna milli ára og voru um 2,4 milljarðar króna. Heimildin greindi frá því í síðustu viku að þær hefðu aukist um 774 milljónir króna á tveimur árum eða um 48 prósent.
Safnað upp 355 milljónum í eigið fé á tveimur árum
Í ársreikningnum kemur fram að gjaldfærð viðskipti við móðurfélagið RÚV hafi numið rúmlega 2,3 milljörðum króna. Það þýðir að RÚV sala heldur eftir hluta af þeim tekjum sem félagið aflar. Þeim tekjum er annars vegar ráðstafað í laun og launatengdan kostnað fyrir þau 17 stöðugildi sem starfa hjá RÚV sölu og hafa það hlutverk að afla RÚV-samstæðunni samkeppnistekna. Hins vegar liggja þær inni í félaginu sem óráðstafað eigið fé. Rúv sala, sem tók til starfa í byrjun árs 2020, átti eigið fé upp á 355,3 milljónir króna um síðustu áramót.
Alls greiddi RÚV sala 225,5 milljónir króna í laun og launatengd gjöld á síðasta ári. Það er aðeins lægri fjárhæð en félagið greiddi ári áður, þegar 16 stöðugildi fengi 227 milljónir króna í heildarlaun.
Meðallaun auglýsingasala dragast lítillega saman
Það þýðir að meðaltal kostnaðar vegna launa og launatengdra gjalda á hvert stöðugildi á mánuði á árinu 2022 hjá RÚV sölu var 1.105 þúsund krónur, sem er tæplega sjö prósent lægri meðallaun en árið áður. Einar Logi Vignisson, framkvæmdastjóri RÚV sölu, hækkaði um 2,4 prósent í launum milli ára og var með um 1.733 þúsund krónur í heildarlaunakostnað að meðaltali á mánuði.
Hjá RÚV samstæðunni allri störfuðu 254 í fyrra og heildarkostnaður vegna launa og lífeyrissjóðsgreiðslna var 3,2 milljarðar króna á árinu 2022. Þegar kostnaður við heildarlaun og lífeyrissjóðsgreiðslur starfsmanna RÚV sölu er dreginn frá launakostnaði RÚV-samstæðunnar er meðaltalskostnaður á hvern eftirstandandi starfsmann 980 þúsund krónur á mánuði. Því eru meðallaunakostnaður starfsmanna RÚV sölu um 13 prósent hærri en meðaltal launakostnaðar allra annarra starfsmanna RÚV-samstæðunnar. Það er minni launamunur en var 2021, þegar meðaltalslaun sölufélagsins voru 21 prósent hærri en annarra RÚV starfsmanna.
Útvarpsstjórinn með 2,7 milljónir á mánuði
Þeim launum er þó nokkuð misskipt innan RÚV en Stefán Eiríksson útvarpsstjóri er til að mynda með 2,7 milljónir króna í heildarlaun og lífeyrissjóðsgreiðslur í fyrra. Laun hans hækkuðu um 8,7 prósent milli ára, eða um 217 þúsund krónur að meðaltali á mánuði. Í tekjublaði Frjálsrar verslunar á sem kom út á síðasta ári kom fram að tólf starfsmenn RÚV væru yfir eina milljón króna á mánuði í laun árið 2021 og sá þrettándi var með 998 þúsund krónur í laun.
RÚV er rekið í samræmi við þjónustusamning sem gerður er við það ráðuneyti sem fer með málefni fjölmiðla hverju sinni. Nú er það ráðuneyti menningar- og viðskiptamála sem stýrt er af Lilju Alfreðsdóttur. Nýr þjónustusamningur var undirritaður í lok árs 2020 og látinn gilda afturvirkt frá 1. janúar á því ári. Hann rennur út í lok þessa árs.
Þarna er Spilling og Politik. Kvi hætti Helgi Seljan og FL. Sanlekurinn ma ekki Heirast.
Þessi Steinsteipu Höll a Haaleytinu er of stor. Það Hus ma selja og finna minna Husrimi
Sem hentar betur. Rikisrekin Fjölmiðil er að keppa við Einkaframtakið. Ef þetta heldur afram að þenjast ut i skjoli Politikur og Valdnyðslu Gengur RUV að Frjalsri Fjölmiðlun Dauðri. Blöð HÆTTA og Einkareknar Utvarpstöðvar lika. RUV þarf að draga saman SEGLIN.