Karl Gauti Hjaltason, fyrrverandi þingmaður Flokks fólksins og Miðflokksins, var í dag skipaður lögreglustjóri í Vestmannaeyjum af Jóni Gunnarssyni dómsmálaráðherra. Karl Gauti féll út af þingi í síðustu kosningum og hefur síðan þá sótt um ýmsar opinberar stöður, meðal annars dómaraembætti. Auk þess sóttist hann eftir stöðu framkvæmdastjóra landskjörstjórnar en fékk ekki. 

Karl Gauti var á meðal þeirra þingmanna sem teknir voru upp á Klaustur bar síðla árs 2018 þar sem fjölmörg ósæmileg ummæli féllu um nafngreint fólk. Hann hélt því sjálfur fram að hann hefði ekki sagt neitt „siðferðislega ámælisvert“. 

Íris Róbertsdóttir, bæjarstjóri í Vestmannaeyjum, var á meðal þeirra sem talað var niðrandi um en Bergþór Ólason, núverandi þingmaður Miðflokksins lét óviðurkvæmileg orð falla um hana. Tíu dögum eftir að samtal þingmannanna á Klaustri var tekið upp mætti Íris fyrir umhverfis- og samgöngunefnd Alþingis til að ræða samgönguáætlun, en Karl Gauti sat í nefndinni og Bergþór var formaður hennar. Þeir gengu báðir úr fundarsal nefndarinnar áður en Íris kom fyrir nefndina. 

Íris tjáði sig um ráðningu Karls Gauta í færslu á Facebook í dag og sagði að hún sem bæjarstjóri myndi auðvitað vinna með þeim lögreglustjóra sem réttilega væri skipaður til starfa í Vestmannaeyjum hverju sinni. „Dómsmálaráðherra hefur væntanlega komist að þeirri niðurstöðu, eftir vandlega íhugun, að þetta sé heppileg og smekkleg ráðstöfun eftir þá kvenfyrirlitningu og almennu mannfyrirlitningu sem mér og fleirum var sýnd á Klaustursbar hér um árið. Þar var hinn nýskipaði lögreglustjóri þátttakandi.“

Karl Gauti mun taka við starfinu næstkomandi laugardag. Hann hefur áður verið sýslumaður og lögreglustjóri í Vestmannaeyjum, frá 1998 til 2014. Þá var hann skólastjóri Lögregluskóla ríkisins á árunum 2014 til 2016, áður enn hann settist á þing árið 2017.