Rýming mun standa áfram að svo stöddu á Seyðisfirði, Eskifirði og í Neskaupstað, utan að rýmingu hefur verið aflétt af svokölluðu svæði 18 í Neskaupstað. Fimm snjóflóð hið minnsta féllu í gær við Neskaupstað en aðeins eitt þeirra lenti í byggð með tilheyrandi tjóni á eignum en sem betur fer ekki manntjóni. Fólk sem var í húsi við Starmýri sem flóðið lenti á skrámaðist þó eitthvað. Unnið er að því að opna veginn innan við bæinn sem flóð féll yfir í gær. „Við verðum eiginlega að nýta þennan glugga til þess, vegna þess að það er spáð leiðindaveðri, annað kvöld og á fimmtudag, með mikilli ofankomu,“ segir Jón Björn Hákonarson, bæjarstjóri í Fjarðabyggð.
Spurður hvernig hann og aðrir íbúar beri sig lætur Jón Björn þokkalega af því. „Við segjum svo sem allt ágætt. Hér er hægviðri núna og menn sáu fjallið í morgun. Það var kannað bæði með sjónskoðun og drónaflugi og það er verið að vinna úr þeim gögnum núna, klárast væntanlega eftir hádegið.“
Kannað hvort gil hafi tæmst
Verið er að kanna hvort gilin sem snjóflóð féllu úr í gær hafi með því hreinsast.„Ef við sjáum að þau hafi hreinsað sig þá erum við nokkuð örugg um að ekki komi meira úr þeim. Það eru gilin og bollarnir sem eru snjóakistur og safna í sig,“ segir Jón Björn.
Ákveðið var að rýma efstu byggðina í Neskaupstað, þær götur sem standa næst varnargörðunum, í gær. Spurður hvort það sé á einhvern hátt áfellisdómur yfir því hvernig garðarnir voru uppbyggðir og hvort staðan ætti ekki að vera sú að nauðsynjalaust væri að rýma hús neðan snjóflóðavarnargarða svarar Jón Björn: „Jú, maður skyldi nú ætla það en þetta var varúðarráðstöfun. Veðurstofan hafði ekki áhyggjur af görðunum sem slíkum en hafði áhyggjur af möguleikanum á að slettuflóð kæmu yfir ef að snjór settist í garðana. En jú, auðvitað er maður að horfa til þess þegar garðarnir eru komnir að þess gerist ekki þörf að rýma hús. Það sem gerðist í gær var að skyggni var svo takmarkað allan daginn að það var ekki hægt að fullvissa sig um stöðu á snjóalögum ofan við garðana, hvort þar væri að fyllast. En við sjáum það núna að það er ekki, þó það hafi komið flóð á ysta garðinn.“
„Þetta er bara eins og vél sem hægt er að setja í gang“
Ekki nema þrjár fjölskyldur gistu í fjöldahjálparstöðinni í Egilsbúð í nótt og gerðu það að eigin beiðni. Aðrir sem rýma þurftu hús sín dreifðust annað, á hótel, heimavist Verkmenntaskólans og heim til ættingja og vina. Egilsbúð verður áfram opin og boðið er upp á mat og sálrænan stuðning sem mannskapur frá Rauða krossinum sinnir.
Mikil vinna við að hreinsa bæinn
Töluverður fjöldi fólks annars staðar af landinu kom austur í gær til aðstoðar heimamönnum, með varðskipinu Þór og þyrlum Landhelgisgæslunnar meðal annars. Þá voru ferjuð austur tæki og tól einnig. Jón Björn segir að sú aðstoð sé ómetanleg, á mjög margan hátt, bæði verklega og andlega. „Það skiptir öllu máli, það er alveg ómetanlegt. Að finna þennan mikla stuðning sýnir okkur hvað við sem þjóð erum ótrúlega hæf til að takast á við náttúruhamfarir. Ég hef mörgum sinnum í mínu starfi unnið með þessu fólki vegna náttúruhamfara og þetta er bara eins og vél sem hægt er að setja í gang.“
„Ég er að horfa á bílinn minn og ég veit ekki hvort ég næ honum út fyrr en í júlí“
Spurður um stöðu mála og hvort vinnustaðir séu til dæmis opnir segir Jón Björn að ekki sé unnið á hafnarsvæðinu í bænum þar sem ennþá sé lokað á milli þar eftir að snjóflóðið féll á veginn. Skólar eru lokaðir í dag en verið er að opna matvörubúðina í bænum. Þá sé verið að moka bæinn en gríðarlegt snjómagn er á götunum. „Ég er að horfa á bílinn minn og ég veit ekki hvort ég næ honum út fyrr en í júlí.“
Jón Björn er að hætta sem bæjarstjóri Fjarðarbyggðar og til stóð að hann myndi láta af störfum um komandi mánaðarmót. Spurður hvort hann fái það nokkuð hlær hann. „Ég veit það ekki. Ég mun að sjálfsögðu vera til staðar á meðan þetta ástand klárast. Ég á hvergi að vera mættur um mánaðarmótin svo ég hef tíma til að moka bílinn út og komast úr bænum. Svo er bara spurning hvort einhver vilji fá mann í vinnu,“ segir Jón Björn glettinn.
Athugasemdir