Fyrri aukaspurning: Hvað nefnist verkfærið á myndinni hér að ofan?

***

Aðalspurningar:

1.  Hvað nefndist varð- og sendiguðinn í norrænni goðafræði?

2.  Hvaða samtök kenna sig við þann guð?

3.  Hvaða leikhúsi stýrir Brynhildur Guðjónsdóttir um þessar mundir?

4.  Í hvaða heimsálfu er ríkið São Tomé e Príncipe?

5.  En ríkið Máritanía, í hvaða heimsálfu er það?

6.  Í ágúst síðastliðnum vakti það bæði óhug og athygli þegar líkamsleifar tveggja barna fundust í ferðatöskum sem geymslufyrirtæki seldi hæstbjóðanda, án þess að hvorki fyrirtækið né kaupandinn höfðu hugmynd um hvað í töskunum væri. Í hvaða landi gerðist þetta?

7.  Fnjóská og Hörgá falla báðar í sama fjörð á Íslandi. Hvað heitir fjörðurinn?

8.  Hann var sonur Laufeyjar og Fárbauta jötuns. Hvað hét hann sjálfur?

9.  Frank Fredericksen hét maður, svonefndur Vestur-Íslendingur, sem kom hingað til lands árið 1919 og hafði meðferðis tæki eitt nýstárlegt sem hann brúkaði síðan fyrstur allra manna á Íslandi það sama ár, aðallega í Vatnsmýrinni. Þetta vakti gríðarlega athygli en tækinu var nú samt pakkað saman og flutt úr landi ári síðar. Hvaða tæki var þetta?

10.  Baldur von Schirach var leiðtogi fjölmennra æskulýðssamtaka á árunum 1931-1940. Hvað nefndust þau?

***

Seinni aukaspurning: Hér má sjá forseta tiltekins lands (til vinstri) skipa tvíburabróður sinn (til hægri) forsætisráðherra. Hvað heita bræðurnir? Hér dugar eftirnafn þeirra.

Og fyrir lárviðarstig: Hvað heitir stjórnmálaflokkurinn sem bræðurnir stofnuðu 2001?

***

Aðalspurningasvör:

1.  Heimdallur.

2.  Samtök ungra Sjálfstæðismanna í Reykjavík.

3.  Borgarleikhúsinu.

4.  Í Afríku.

5.  Líka í Afríku.

6.  Nýja Sjálandi.

7.  Eyjafjörður.

8.  Loki.

9.  Flugvél.

10.  Hitler Jugend, Hitlersæskan.

***

Svör við aukaspurningum:

Verkfærið heitir slípirokkur.

Bræðurnir heita Kaczyński. Forsetinn Lech dó í flugslysi 2010 en Jarosław er enn formaður flokksins sem þeir stofnuðu, Lög og réttlæti nefnist hann á íslensku.