Fyrri aukaspurning:
Myndin hér að ofan er kölluð Fæðing ... ja, fæðingar hverrar eða hvers?
Svo fæst Renisans-stig fyrir að muna nafn málarans.
***
Aðalspurningar:
1. Hvað er „svarta mamba“?
2. Hver er stærsti, já langstærsti kirtill mannslíkamans?
3. Við hvaða íþrótt á skammstöfunin NBA?
4. Árið 1991 fannst í Ötztal-Ölpunum í Austurríki lík manns sem bersýnilega hafði verið myrtur með bogaskoti. Enginn veit hver myrti hann, né hver hann var í raun og veru, þótt líkið hafi verið vel varðveitt og síðan rannsakað í þaula. Líkið er því yfirleitt kallað Ötzi í höfuðið á fjöllunum þar sem maðurinn fannst. En hvað þykir merkilegast við þennan líkfund?
5. Hver lék aðalkarlhlutverkið í fyrstu tveimur Terminator-myndunum?
6. Í hvaða landi er borgin Vancouver?
7. Kristrún Frostadóttir er nú tekin við sem formaður Samfylkingarinnar. Áður en hún fór út í pólitík starfaði hún í banka. Hvaða banka?
8. Hvaða fjallgarður í Evrópu mun hækka mest næstu 100 árin? Eru það Alpafjöllin — Appenínafjöllin — Karpatafjöllin — eða Skandinavíufjöllin?
9. Hvernig er blóð kolkrabba á litinn?
10. The Musalman heitir elsta og sennilega eina handskrifaða dagblaðið sem gefið er út í heiminum. Það er blessunarlega ekki nema fjórar síður en skrautritarar skrifa það vandlega upp á hverjum degi og svo er það fjölritað og prentað og dreift á kvöldin. Í hvaða landi er The Musalman gefið út?
***
Seinni aukaspurning:
Úr hvaða kvikmynd er skjáskotið hér að neðan?
***
Svör við aðalspurningum:
1. Eiturslanga.
2. Lifrin.
3. Körfubolta. NBA er bandaríska körfuboltadeildin í karlaflokki.
4. Líkið er mörg þúsund ára gamalt.
5. Arnold Schwarzenegger.
6. Kanada.
7. Kviku.
8. Skandinavíufjöllin á mótum Svíþjóðar og Noregs. Þau eru enn að hækka eftir að álagi vegna burthorfinna ísaldarjökla létti fyrir 10 þúsund árum. Hækkunin er að vísu innan við sentimetri á ári, en næstu 10 þúsund árin gætu þau hækkað um 400 metra.
9. Blátt.
10. Á Indlandi.
***
Svör við aukaspurningum:
Málverkið nefnist Fæðing Venusar, og málarinn hét Botticelli.
Skjáskotið hið neðra er úr Nútímanum eða Modern Times. Leikstóri og aðalleikari var Chaplin.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir