„Við foreldrarnir erum mjög vonsviknir,“ segir faðir manns sem varð fyrir hnífstunguárás fyrir framan skemmtistaðinn 203 Club við Austurstræti þann 5. mars 2022. Til átaka hafði komið inni á skemmtistaðnum og lýsti brotaþoli, 21 árs gamall maður, því hvernig hann hefði gengið þar á milli. Hann hefði síðan farið út af skemmtistaðnum og staðið þar, þegar maður kom aftan að honum með orðunum: „Was this you?“ og látið höggin dynja á honum. 

Líkamsárás en ekki tilraun til manndráps 

Tveir menn, Daniel Zambrana Aquilar og Raúl Ríos Rueda, voru ákærðir fyrir að ráðast að manninum með hnefahöggum og óþekktu stunguvopni, líklega skrúfjárni. Í dómnum er tekið fram að ekkert hafi komið fram sem gæti skýrt ástæður árásarinnar, sem hafi verið tilefnislaus. Á myndbandsupptökum mátti sjá að brotaþoli kom engum vörnum við og bar hendur fyrir höfuð sér. 

„Nú spyr ég, hvað hélt hann að myndi gerast?“

Saksóknari krafðist refsingar fyrir tilraun til manndráps, en fyrir dómi neitaði Daniel staðfastlega að hafa ætlað að ráða brotaþola bana. Sagðist hann ekki hafa getað ímyndað sér að hann gæti valdið jafn miklum skaða og raunin varð þegar hann greip áhald upp af götunni og beitti því ítrekað á brotaþola. Höggin, sem voru að minnsta kosti sex talsins, náðu í gegnum jakka brotaþola. Áverkarnir voru lífshættulegir, en lungu féllu saman, auk þess sem brotaþoli var allur í sárum. Mat dómsins var að ekki væri hægt að slá því föstu að Daniel væri ljóst, þegar hann stakk brotaþola ítrekað, að bani kynni að hljótast af atlögunni. Var hann því sýknaður af tilraun til manndráps, en sakfelldur fyrir stórfellda líkamsárás.  

Tilefnislaus og ofsafengin árás

Dómurinn féll í gær, 25. ágúst. „Líkamsárásin var tilefnislaus og ofsafengin og afleiðingarnar alvarlegar,“ segir í dómsorði. Var Daniel dæmdur í tveggja og hálfs árs fangelsi fyrir árásina, auk þess sem honum var gert að greiða 1,5 milljónir í miskabætur. 

Hinn maðurinn sem tók þátt í árásinni fyrir utan 203 Club, Raúl Ríos, fékk þriggja mánaða skilorðsbundinn dóm vegna aðildar að atvikum og var gert að greiða 400 þúsund í miskabætur.

Um leið var Daniel dæmdur fyrir að brjóta tennur í 24 ára gömlum manni fyrir utan Prikið, með því að veitast að honum með ofbeldi og gefa honum olnbogaskot í andlitið. Brotaþola í því máli voru dæmdar 500 þúsund krónur í miskabætur.   

Stunginn sex eða sjö sinnum 

Foreldrum brotaþola er fyrirmunað að skilja niðurstöðu dómsins. Faðir hans segir að sonur sinn hafi ekki komið neinum vörnum við og engin ógn hafi stafað af honum. „Annar mannanna stakk son minn sjö sinnum með vopni, kannski skrúfjárni, sem olli því að bæði lungu hans féllu saman og hann var í hættu á að fá hjartaáfall. Dómari féllst á rök lögfræðings Daniels að um stórfellda líkamsárás væri að ræða frekar en manndrápstilraun, því Daniel hafi ekki gert sér grein fyrir því að árásin með vopninu gæti orðið syni mínum að bana. Nú spyr ég, hvað hélt hann að myndi gerast?“

Bendir hann á hversu mikið afl þurfti til að valda þessum skaða, því stungurnar fóru í gegnum þykkan fóðraðan gallajakka, hettupeysu og bol. „Vopnið fannst aldrei en myndband náðist af Daniel skila vopnum frá sér og ná í það aftur.“ 

Hann hefur áhyggjur af fordæmisgildinu. „Hér finnst áhyggjuefni hversu mikið slíkar árásir hafa aukist. Þess vegna finnst mér þessi dómur mikil vonbrigði. Er verið að normalísera vopnaðar árásir, með þessari niðurstöðu?“