„Svona lífsreynsla markar mann fyrir lífstíð og skilur eftir ör á sálinni“

Vilborg Arna Giss­ur­ar­dóttir, sem hefur bæði gengið á skíðum þvert yfir Suð­ur­skauts­landið og klifið á hátind Everst-fjalls, segir að sam­band hennar við fjalla­leið­sögu­mann, sem önnur kona ræddi um í gær­kvöldi, hafi verið „þyngsti bak­pok­inn og hæsta fjallið að klífa“.

Vilborg Arna er ein þriggja kvenna sem ræddu um reynslu sína af ofbeld­is­sam­bandi við mann­inn á Facebook í gær­kvöldi. Vilborg studdi frá­sögn fyrstu kon­unnar í ummælum í gær, en í nýrri, opinni færslu á Facebook segir Vilborg sam­bandið hafa markað hana.

„Heim­il­is­of­beldi og hvers kyns ofbeldi í öllum sínum birt­ing­ar­myndum er þungt farg að bera fyrir þolendur slíkra mála, fjöl­skyldur og alla þá sem tengj­ast á einn eða annan hátt. Eins og margir vita nú þegar teng­ist ofbeld­is­mál sem er nú til umfjöll­unar í fjöl­miðlum mér og er ég ein af þeim konum sem um ræðir. Svona lífs­reynsla markar mann fyrir lífs­tíð og skilur eftir ör á sál­inni. Með aðstoð góðs fólks og tím­anum grynnka örin þó þau hverfi kannski aldrei alveg. Minn bak­poki er ansi þungur eftir lífs­reynslu síð­ustu ára og hefur markað mig á ýmsan hátt þó ég beri það ekki utan á mér. Eins hefur þetta haft afleið­ingar sem hefur tekið tíma að vinna úr og sú vinna heldur auð­vitað áfram.“

Vilborg var sam­starfs­kona manns­ins og seg­ist hafa upp­lifað ofbeldi bæði í starfi og einka­lífi. „Ég styð þá frá­sögn sem fram hefur komið og hef staðið í sömu sporum bæði á meðan á sam­bandi okkar stóð og einnig á okkar sam­starfs­vett­vangi.“

Hún bendir á að engin ein útgáfa sé til af þolendum. „Þolendur og ger­endur eru ekki steyptir í eitt fast mót eins og hefur skýr­lega komið fram á síð­ast­liðnum vikum. Það erum við sem sam­fé­lag að læra betur og betur. Það skiptir máli að standa saman og umvefja þolendur ásamt því að úrlausnir séu til staðar fyrir ger­endur.“

Þá hafi hún fengið hvatn­ingu af vakn­ingu í þjóð­fé­lags­um­ræð­unni. „Fyrir mig per­sónu­lega hefur sú vakn­ing sem hefur átt sér stað að und­an­förnu skipt miklu máli og það er mik­il­vægt að við höldum áfram á þeirri braut. Ég mun leggja mitt á vog­ar­skál­arnar þegar kemur að þeirri umræðu.“