„Það fór ekki svo að Kóvíð kon­ungur næði manni ekki inn í ríki sitt,“ skrifar Hall­grímur Helgason rit­höf­undur, sem fluttur var af slökkvi­liðs­manni á sótt­varn­ar­hót­elið við Rauð­ar­ár­stíg í gær­kvöldi, eftir að hafa greinst smit­aður af Covid-19, einn 72 Íslend­inga í gær. 

Alls eru 897 Íslend­ingar í ein­angrun í dag og 1.169 í sótt­kví. Það flækir stöð­una hjá Hall­grími að hann var einn þriggja gesta í Vikunni hjá Gísla Marteini Bald­urs­syni á RÚV á laug­ar­dags­kvöld­inu, eins og hann lýsir á Facebook-síðu sinni.

„Vona svo bara að ég hafi ekki smitað neinn í sett­inu hjá honum Gísla Marteini. Þau eru þrjú komin í sótt­kví mín vegna, hann sjálfur, Katrín Halldóra Sig­urð­ar­dóttir og Sóli Hólm, ein­kenna­laus sem betur fer, og smit­skömmin því í lág­marki. Aðrir sem ég hitti á föstu­dag­inn eru í smit­gát. Allir nei­kvæðir að ég best veit,“ segir hann.

Ein­kenna­lausSessu­nautar Hall­gríms eru ein­kenna­lausir í sótt­kví.

Mynd: RÚV

Hall­grímur er „vel flens­aður og slappur en þó enn með bragð- og lykt­ar­skyn“, „enda tví­var­inn með Astra Zeneca síðan í sumar,“ eins og hann segir. 

Af þeim 72 sem greindust smit­aðir í gær voru tæp 40% ekki bólu­sett, en það er mun hærra hlut­fall en fjöldi óbólu­settra í sam­fé­lag­inu segir til um. 76% lands­manna eru bólu­settir og 89% full­orð­inna.

Hall­grímur eggjar alla lands­menn að láta bólu­setja sig. „En við ykkur sem enn eigið eftir að láta bólu­setja ykkur segi ég: Gerið það strax!“ segir hann og hnykkir út: „Guð blessi bólu­efnin!“

Hall­grímur tekur sér­stak­lega fram að þau sem komu í útgáfu­teiti hans á fimmtu­dag þurfi ekki að bregð­ast við, þar sem línan sé dregin við föstu­dags­morgun.