Hættuástand gæti skapast við Geldingadali þar sem ný sprunga opnaðist á svæðinu, þar sem fólk var samankomið til þess að skoða eldgosið. Verið er að rýma svæðið sem verður lokað þar til frekari upplýsingar liggja fyrir. Tilkynning þess efnis barst frá lögreglustjóranum á Suðurnesjum nú í hádeginu. Tvær þyrlur frá Landhelgisgæsluni eru á leið á vettvang, sem og 50 manna björgunarsveitarhópur. Nýja sprungan er um 500 metra löng og má sjá á vefmyndavél RÚV, sem hefur verið snúið að henni. Gasmengun gæti aukist með tilkomu nýrrar sprungu.
Starfsmaður Veðurstofu Íslands sagði í samtali við RÚV að tilkynning um nýja sprungu hafi borist frá flugmönnum í Keflavík. Þar var jafnframt haft eftir Magnúsi Tuma að um ákveðna stigmögnun væri að ræða. Enn sem komið er kemur þó afskaplega lítill eldur frá nýju sprungunni.
Kalt hefur verið úti síðustu daga og svæðinu lokað á laugardag vegna veðurs. Frá því að gosið hófst hafa aldrei verið færri lagt í gosleiðangur en í gær, eða aðeins um 480 einstaklingar. Til samanburðar voru 5.128 við gosið á föstudaginn langa.
Breytingar hafa verið að myndast á síðastliðnum dögum. Til að mynda varð breyting við gígana á laugardag þegar hraunpollurinn sem hafði myndast norður af Norðra tæmdist, samkvæmt eldfjallafræði og náttúruvárhópi Háskóla Íslands. Lægð í rima hans að norðanverðu benti til þess að útflæðið hafi verið til norðvesturs, án þess að það hafi verið vitað með vissu. Flæði hélt þó áfram í pollinn. Um leið höfðu hrúgöldin sem urðu til við hraun frá gígveggnum færst til og voru tímabundið á floti á hraunflæðinu.
Áður höfðu enn ein kaflaskiptin orðið á gosinu,mögulega aðfarðarnótt föstudagsins langa, þegar fyrsta marktæka gjóskufallið barst frá Norðra, gullituð vikurkorn auk þess gjóskufallið innihélt talsvert af Nornahárum sem voru allt að 10 sentímetra löng.
Athugasemdir