Móðir stúlkunnar sem lenti í snjóflóðinu á Flateyri og grafin var upp úr því í nótt segist muni vera ævinlega þakklát björgunarsveitinni á Flateyri sem björguðu dóttur hennar. „Kraftaverk að ekki fór verr,“ segir hún.

Tvö snjóflóð féllu á Flateyri á tólfta tímanum í gær. Annað þeirra lenti á íbúðarhúsi við Ólafstún þar sem fjögurra manna fjölskylda býr. Móðirin komst út um glugga með yngri börnin sín tvö en elsta barnið, stúlka á unglingsaldri, grófst undir flóðinu í svefnherbergi sínu. Liðsmenn úr Björgunarsveitinni Sæbjörgu á Flateyri komu mjög fljótt á staðinn og hófu leit að stúlkunni. Aðstæður voru mjög erfiðar til björgunar, að sögn Magnúsar Einars Magnússonar, formanns björgunarsveitarinnar. „Snjórinn varð mjög fljótt mjög harður og það var eins mjög erfitt að koma snjó út úr herberginu. Það reyndi því talsvert á mannskapinn en sem betur fer fór þetta vel.“

Móðir stúlkunnar birti í nótt færslu á Facebook þar sem hún greindi frá því að snjóflóð hefði fallið á húsið og dóttir hennar lent undir flóðinu en þau hin bjargast út. Björgunarsveitin hefði komið fljótt á staðinn og grafið dóttur hennar úr flóðinu. „Hún er heil á húfi talar og hreyfir allt eðlilega,“ skrifaði móðirin og bætti við að beðið væri eftir að læknir kæmi til Flateyrar til að skoða dóttur hennar.

„Bara nokkrar skrámur, þvílíkt kraftaverk“

Varðskipið Þór var fyrir vestan og sigldi það af stað frá Ísafirði með björgunarsveitarfólk, lögreglumenn og heilbrigðisstarfsfólk. Siglt var með fjölskylduna yfir á Ísafjörð þar sem þau voru flutt til skoðunar á sjúkrahúsinu. Í færslu sem móðirin birti í morgun segir hún að hún hafi farið í betri bátsferðir, „en ekki hefði ég viljað sigla þetta með öðru skipi“. Þá ítrekar hún að dóttir sín sé heil á húfi. „Bara nokkrar skrámur, þvílíkt kraftaverk. Hún var í 40 mínútur grafin undir snjónum og mun ég vera ævinlega þakklát björgunarsveitinni á Flateyri fyrir snör handtök við að grafa hana upp. Eins öðrum Flateyringum sem hlúðu að okkur krökkunum og sáu til þess að okkur væri hlýtt og buðu fram opin faðm sinn. Auðvitað áhöfn varðskipsins, læknum og öllum sem stukku til [...] Kraftaverk að ekki fór verr, mikið er ég þakklát.“

Enn er mjög vont veður fyrir vestan og á Flateyri sést varla milli húsa. Hættustig er enn yfirstandandi á svæðinu og segir Magnús Einar, formaður Sæbjargar, að ákvarðanir um aðgerðir verði teknar þegar líður á daginn.