Vilja lokunarstyrki fyrir knattspyrnufélög og hlutabótaleið fyrir leikmenn

Stjórn Knatt­spyrnu­sam­bands Íslands (KSÍ) fer fram á það í áskorun til stjórn­valda að sum úrræði sem í boði eru fyrir rekstr­ar­að­ila og ein­stak­linga, og kynnt hafa verið til leiks í aðgerða­pökkum síð­ustu vikna, verði einnig látin nýt­ast íþrótta­hreyf­ing­unni.

Því sé mjög ábóta­vant í þeim úrræðum stjórn­valda sem kynnt hafa verið til þessa og úr því þurfi nauð­syn­lega að bæta. „Til dæmis getur íþrótta­hreyf­ingin ekki nýtt sér lok­un­ar­styrki þrátt fyrir að starf­semi á hennar vegum hafi verið stöðvuð í þágu sótt­varna. Eins nýt­ast launa­úr­ræði illa vegna fjölda hluta­starfa í hreyf­ing­unni, en þau úrræði geta ekki nema um 30% starfs­fólks knatt­spyrnu­hreyf­ing­ar­innar nýtt sér.“

Flestir leik­menn knatt­spyrnu­liða á Íslandi spila ekki knatt­spyrnu að aðal­starfi heldur er um hálf-atvinnu­mennsku eða áhuga­mennsku að ræða.

Skilyrði fyrir leiðunum

Í hluta­bóta­leið­inni svoköll­uðu er mark­miðið að vinnu­veit­endur haldi ráðn­ing­ar­sam­bandi við starfs­menn sína eins og mögu­legt er, í stað þess að segja fólki upp. Til að ná þessu mark­miði hefur hið opin­bera skuld­bundið sig til að greiða allt að 75 pró­sent af launum þeirra sem skrá sig á leið­ina til 1. júní næst­kom­andi hið minnsta.

[adspot]Lok­un­ar­styrkirnir voru kynntir í síð­ustu viku. Í þeim felst að fyr­ir­tæki eða ein­yrkjar sem þurftu að loka starf­semi sinni vegna lög­boðs stjórn­valda í tengslum við sótt­varn­ar­að­gerðir vegna útbreiðslu veirunnar sem veldur COVID-19 sjúk­dómnum munu geta fengið styrki úr rík­is­sjóði. Styrkirnir verða í boði fyrir þau fyr­ir­tæki sem geta sýnt fram á að minnsta kosti 40 pró­sent tekju­fall og að þau séu með opin­ber gjöld í skilum. Hver aðili mun geta fengið allt að 800 þús­und krónur fyrir hvern starfs­mann en 2,4 millj­óna króna styrk að hámarki.

Vilja betrumbætur á úrræðum

Í áskorun stjórnar KSÍ segir að óhjá­kvæmi­legar sótt­varn­ar­að­gerðir stjórn­valda vegna far­ald­urs­ins hafi leitt af sér stöðvun á íþrótta­starf­semi í land­inu og komið sér mjög illa fyrir knatt­spyrnu- og íþrótta­hreyf­ing­una í heild sinni. „Rétt er að minna á að íþrótta­hreyf­ingin hefur á liðnum ára­tugum lyft grettistaki hvað varðar holla íþrótta­iðkun ungs fólks og fyllt þjóð­ina stolti yfir árangri afreks­fólks á inn­lendum og erlendum vett­vangi. Þennan árangur er mik­il­vægt að varð­veita með öllum til­tækum ráðum og búa í hag­inn fyrir enn frek­ari sókn.“

Þar segir að knatt­spyrnu­hreyf­ingin horfi til þess að aðgerðir rík­is­stjórnar og sveit­ar­fé­laga létti þeim róð­ur­inn þannig að lág­marka megi þann skaða sem þegar er orð­inn. Því beini stjórn KSÍ þeirri ein­dregnu áskorun til stjórn­valda að tryggja íþrótta­hreyf­ing­unni öfl­uga við­spyrnu á kom­andi vikum og mán­uðum. „Með betrum­bótum á þessum úrræðum ásamt öðrum aðgerðum myndi rekstr­ar­um­hverfi íþrótta­fé­lag­anna verða betra og félögin, sem ekki eru rekin í hagn­að­ar­skyni, geta frekar sinnt sínu mik­il­væga sam­fé­lags­lega hlut­verki.“