Söfnun er hafin fyrir Kristínu Geirsdóttur, sem slasaðist alvarlega í bílslysi á Reykjanesbrautinni þann 17. október síðastliðinn. Kristín var í fæðingarorlofi þegar slysið varð en hún og maðurinn hennar, Sveinn Ingi Bjarnason, eiga þriggja mánaða gamlan son, Leonard Aaron.
„Hún meiddist mjög alvarlega og lá á gjörgæslu í fimm daga. Kristín beinbrotnaði víðsvegar um líkamann, fékk mar á lungu og skurði í andlit. Hún fór í stórar aðgerðir og þarf nú aðstoð við flestallar athafnir daglegs lífs. Ljóst er að margra mánaða endurhæfing er framundan,“ segir í færslu sem Erla Dögg Kristjánsdóttir, vinkona Kristínar, deilir á Facebook.
„Álagið er mikið á litlu fjölskyldunni um þessar mundir, jafnt andlegt sem fjárhagslegt. Til að mæta tekjutapi og óvæntum útgjöldum sem framundan eru hjá Kristínu og fjölskyldu hennar höfum við vinir hennar ákveðið að hefja söfnun til að auðvelda þeim lífið á þessum erfiðu tímum. Þeir sem vilja styðja við bakið á þeim geta lagt inn á reikning Kristínar: 0544-26-006584 kt. 031084-2299,“ skrifar Erla Dögg.
Athugasemdir