MS seldi á síðasta ári rúmlega 1,6 milljón stykki af 250 millilítra G-mjólkurfernum með röri. Um er að ræða bæði venjulega G-mjólk og létta.
Ólíkt flestum öðrum mjólkurafurðum sem seldar eru í litlum umbúðum, kemur G-mjólkin með röri á hliðinni eins og hún sé ætluð til drykkjar, eins og ávaxtasafi eða Kókómjólk. En langflestir nota mjólkina hins vegar út í kaffi.
Jón Axel Pétursson, framkvæmdastjóri sölu- og markaðssviðs MS, segir pökkunarvél G-mjólkurinnar afar óhentuga fyrir vöruna.
„Þetta er alveg skelfileg vél til að nota í þessa vöru. Það er ömurlegt fyrir okkar neytendur að hún sé að framleiða þetta svona,” segir hann. „En það hefur ekki verið fjárhagslegur grundvöllur fyrir því að kaupa nýja bara í þessa framleiðslu, þar sem kostnaður við svona pökkunarvélar hleypur á hundruðum milljóna. Ódýrasta vélin kostar um 100 milljónir.”
Að sögn Jóns Axels er það sem flækir málið enn frekar varðandi endurnýjun á pökkunarvél er að G-mjólk er með mun lengra geymsluþol en aðrar mjólkurvörur, eða sex mánuði. Hún er háhitameðhöndluð sem gerir allan búnað tengda henni dýrari.
„Það er til fersk mjólk í 250 millilítra fernum með tappa, sem er líka hægt að nota í kaffi,” segir Jón Axel. „En flestir kjósa þessa því hún þarf ekki að geymast í kæliskáp.”
Sumir kannast við að rekast á ferðamenn á förnum vegi með G-mjólkurfernu í hönd sem þau drekka af bestu lyst úr rörinu sem fylgir með. Jón Axel segir það vissulega tíðkast víða erlendis að G-mjólk sé drukkin, en hér á landi er hún nær einvörðungu notuð í kaffi. Og rörið oftar en ekki notað til að sprauta mjólkinni í bollann, með misjöfnum afleiðingum. Þá getur líka reynst snúið að opna fernuna svo vel fari.
„Það er vesen sem allir kannast við,” segir Jón Axel.
Kaffirjóminn frá MS sem og rjóminn í 250 millilítra umbúðum koma ekki í fernum með rörum. Jón Axel segir þetta vissulega vert skoðunar.
„Við höfum bara aldrei fengið svona ábendingu áður,” segir hann. „Og munum taka hana til greina.”
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir