Rio Tinto hefur selt álver sitt í Dunkirk í Frakklandi til manns að nafni Sanjeev Gupta. Gupta hefur að sögn Financial Times sýnt áhuga á að kaupa einnig álver fyrirtækisins í Straumsvík sem og álstarfsemi þess við Kyrrahafið fyrir meira en tvo milljarða dollara.
Fréttir bárust af því í september síðastliðnum að Rio Tinto hefði áform um að selja starfsemi sína í Straumsvík í Hafnarfirði. Rannveig Rist forstjóri fyrirtækisins sagði afkomuna hafa verið slaka en þó farið batnandi með hækkandi álverði. Þó hafi helsta ástæða fyrir mögulegri sölu fyrirtækisins verið sú að framleiðslan í Straumsvík sé sértæk og ólík annarri framleiðslu Rio Tinto auk þess sem fjarlægð frá öðrum fyrirtækjum álrisans sé mikil.
Gupta hefur samkvæmt frétt Financial Times verið umsvifamikill í viðskiptum og byggt upp stórt iðnaðarveldi sem rekur allt frá virkjunum til framleiðslufyrirtækja á sviði bílavarahluta. Hann hefur keypt töluvert af iðnaðarfyrirtækjum í vanda á undanförnum árum og var kallaður „Man of Steel“ í heimildarmynd BBC um viðskiptasögu hans. Hann hefur að sögn þá sýn að endurbyggja iðnað í Bretlandi á endurvinnslu málma og með því að nýta endurvinnanlega orku.
Verðið fyrir söluna á álverinu í Dunkirk liggur ekki fyrir en Gupta keypti starfsemi Rio Tinto í Skotlandi árið 2016 sem var mun minni í sniðum fyrir 410 milljónir dollara. Búast má við að verðmiðinn verði hærri að þessu sinni.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir