Margeir Sveinsson, yfirlögregluþjónn og stjórnandi miðlægrar rannsóknardeildar hjá lögreglunni á höfuðborgarsvæðinu, er kominn í leyfi. Eitt af því sem var til skoðunar áður en hann fór í leyfi var ákvörðun hans um að taka undirmann sinn úr fyrirhugaðri aðgerð hjá embættinu án faglegrar ástæðu.
Vísir greinir frá þessu og segir Gunnar Rúnar Sveinbjörnsson, kynningarfulltrúa hjá lögreglunni á höfuðborgarsvæðinu, hafa staðfest þetta skriflega við fréttastofu.
Lögreglustjóri neitaði
Blaðamaður Heimildarinnar hafði samband við lögreglustjórann á höfuðborgarsvæðinu, Höllu Bergþóru Björnsdóttur, föstudaginn 8. september en hún vildi ekki staðfesta að stjórnandi miðlægrar rannsóknardeildar væri kominn í leyfi.
Grímur Grímsson yfirlögregluþjónn hefur tekið við verkefnum Margeirs. Hann sagðist í samtali við Heimildina ekki geta tjáð sig um málefni einstakra starfsmanna.
Samkvæmt Vísi var sálfræði- og ráðgjafarstofa fengin til að taka stjórnunarhætti Margeirs til skoðunar, ræða við starfsfólk og skilaði síðan skýrslu til yfirstjórnar lögreglunnar.
Óskýr svör
Blaðamaður Heimildarinnar sendi Gunnari Rúnari póst í morgun þar sem sagði:
„Ég sé á Vísi að þú hefur staðfest að Margeir Sveinsson sé kominn í leyfi.
Á föstudaginn fyrir viku hringdi ég í Höllu Bergþóru, lögreglustjóra, og spurði hvort stjórnanda miðlægrar rannsóknardeildar hefði verið vikið tímabundið frá störfum en hún sagði það rangt. Var Margeir þá ekki kominn í leyfi?“
Gunnar Rúnar svaraði fyrir stundu:
„Margeir hefur verið í leyfi en lögreglustjóri var að vísa til þess að umræddum starfsmanni hafi ekki verið veitt lausn frá embætti, hvorki tímabundið né ótímabundið.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir