Eldgos er hafið á Reykjanesskaga á ný. Kvika þrýstist nú upp á yfirborðið á sprungu sem staðsett er innan hraunsins sem rann í síðasta gosi.
Samkvæmt tilkynningu frá Veðurstofunni er gossprungan í vestanverðum Merardölum, um 1,5 kílómetra norður af Stóra-Hrút. Veðurstofan segir að miðað við vefmyndavélar hafi kvika fyrst brotið sér leið upp á yfirborð kl. 13:18. Gas berst frá jarðeldinum.
Almannavarnir biðja fólk um að fara með gát og forðast að vera á svæðinu, en vísindafólk er á leiðinni á staðinn með þyrlu Landhelgisgæslunnar til þess að leggja mat á stöðuna.
Mikil skjálftavirkni hefur verið í kringum Fagradalsfjall undanfarna daga og í morgun sagði Veðurstofan að um tíu þúsund jarðskjálftar hefðu mælst á svæðinu frá því á laugardag.
Glögglega má sjá hraun renna á vefmyndavélum sem Ríkisútvarpið og mbl.is halda úti á svæðinu.
Fyrra eldgosið í Geldingadölum hófst 19. mars í fyrra, eftir jarðskjálftahrinu sem staðið hafði í meira en þrjár vikur. Þá voru næstum 800 ár frá síðasta eldgosi á Reykjanesskaganum.
Hraunflæði frá gígnum í Geldingadölum hætti 18. september í fyrra, eftir að gosið hafði staðið í um hálft ár. Flatarmál hraunsins sem rann varð um 5 ferkílómetrar. Fyrra gosinu lauk formlega þann 18. desember 2021, en þá voru þrír mánuðir liðnir frá síðasta hraunflæði.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.












































Athugasemdir