Fólk sem var eitt í heimili var mun líklegra til að vera á leigumarkaði en á heimilum þar sem voru tvö fullorðin eða fleiri. Árið 2016 var 41 prósent einstaklingsheimila á leigumarkaði, 48,3 prósent karla sem bjuggu einir og 32,5 prósent kvenna í sömu stöðu. Um helmingur einstæðra foreldra, eða 51,8 prósent, bjó í leiguhúsnæði árið 2016.
Þetta kemur fram í niðurstöðum lífskjararannsóknar Hagstofu Íslands fyrir árin 2004 til 2016 sem birtust í dag á vefsíðu stofnunarinnar.
Rúmlega fjórðungur heimila, eða 26,4 prósent, var á leigumarkaði árið 2016 eða áætlað um 35.100 heimili. Á sama tíma voru 73,6 prósent heimila í eigin húsnæði eða um 97.500 heimili.
Af heimilum með börn voru 22,5 prósent á leigumarkaði en meðal barnlausra heimila var hlutfallið hærra eða 28,8 prósent.

Tekjulágir frekar á leigumarkaði
Þegar litið er á stöðu fólks í lægsta fimmtungi ráðstöfunartekna árið 2016 voru 44,2 prósent á leigumarkaði á meðan hlutfallið var 6,6 prósent í hæsta tekjufimmtungi. Af þessu má sjá að eftir því sem ráðstöfunartekjur eru hærri, því lægra hlutfall er á leigumarkaði, að jafnaði.
Þegar staðan árið 2016 er borin saman við árið 2004, þegar lífskjararannsóknin var fyrst lögð fyrir, jókst hlutfall leigjenda í lægsta tekjufimmtunginum um 77 prósent. Hins vegar var ekki marktæk breyting á hlutfalli leigjenda í þeim hópi sem hafði hæstar tekjur milli áranna tveggja.
Hlutfall fólks á leigumarkaði árið 2016 tengdist einnig aldri. Hæst var hlutfall á leigumarkaði meðal fólks á aldrinum 25 til 34 ára eða 38,8 prósent, en lægst í elstu aldurshópunum. Um 22,8 prósent barna 0 til 17 ára bjó í leiguhúsnæði árið 2016. Þetta er vöxtur um 85 prósent miðað við árið 2004 er hlutfallið var 12,3 prósent.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.













































Athugasemdir