Páll Vilhjálmsson, sögukennari við Fjölbrautaskólann í Garðabæ, sem reglulega er vitnað til í Staksteinum Morgunblaðsins, telur að hnattræn hlýnun sé „hugmyndafræði en ekki vísindi.“ Þessu hélt hann fram í viðtali á Útvarpi Sögu í gær. Að sögn Páls nota vinstrimenn „hugmyndafræðileg tákn til að koma boðskapnum á framfæri, eins og ungu, saklausu, fallegu stúlkuna Gretu Thunberg sem getur auðvitað alls ekki vitað eitt eða neitt um vísindi“.
Hann telur þetta þó misráðið af loftslagshreyfingunni. „Ef Greta Thunberg væri aldraður vísindamaður, með mikinn ljóma í kringum sig, væri hún trúverðugri talsmaður fyrir þessa ruglhugsun, að það sé til manngert veður.“ Páll segir að ungir upprennandi vísindamenn sem trúi ekki á hamfarahlýnun eigi enga möguleika í vísindaheiminum. Þeir sem gagnrýni hnattræna hlýnun fái á sig stimpilinn „afneitarar“.
Páll heldur því fram að fólk hafi komið sér saman um að trúa á hamfarahlýnun af manna völdum vegna þess að með hruni kommúnismans og Sovétríkjanna hafi myndast „hugmyndafræðilegt tóm“. Loftslagsógnin réttlæti ríkisafskiptin sem séu ær og kýr vinstrimanna. Segir Páll að „þessi meinta góðmennska gagnvart jörðinni“ valdi fólki sem á um sárt að binda ennþá meiri erfiðleikum en það búi við nú þegar.
Uppi varð fótur og fit árið 2015 þegar Páll skrifaði pistil undir yfirskriftinni „Vont kynlíf er ekki nauðgun-strákasjónarhorn“. „Að þessi maður sé lærimeistari ungmenna í Fjölbrautaskólanum í Garðabæ er ekki boðlegt. Hverslags kjaftæði er þetta. Hver er tilgangurinn með þessum skrifum?“ skrifaði Máni Pétursson útvarpsmaður, sem sat í skólanefnd Fjölbrautaskólans í Garðabæ.
Athugasemdir