Snorri leitar að ríkum og vondum bakhjörlum

Snorri Másson fjöl­miðla­maður hefur nú stofnað nýjan fjöl­miðil: Snorra Másson rit­stjóra. Snorri er eini starfs­maður mið­ils­ins og er jafn­framt rit­stjóri hans. Hann vill með þessu gera sitt til þess að fylla í gat sem hann telur vera á fjöl­miðla­mark­aði með gagn­rýnni umræðu blaða­manns sem við­ur­kennir að hann geti ómögu­lega verið hlut­laus. 

„Blaða­menn sem ætla að vera hlut­lausir þurfa bara að tjá sig í gegnum aðrar leiðir, með því að velja við­mæl­endur og áherslur,“ segir Snorri.

„Ef þeir ætla ekki að segja: „Þetta frum­varp er ömur­legt“ þá finna þeir ein­hvern til þess að segja það, í stað þess að segja bara sjálfir: „Þetta frum­varp er ömur­legt.““

Snorri ætlar sér því ekk­ert að skafa af skoð­unum sínum á mál­efni líð­andi stundar, sér­stak­lega í gegnum það sem hann kallar „mál­efna­legar per­són­u­árásir“. 

„Mér líður aldrei sér­lega vel með það þegar ég er að hjóla í fólk, ég gerði það stundum í Íslandi í dag. Svo hugsa ég: „Fólk þarf á þessu efni að halda.“ Þetta er ákveðin þjón­usta,“ segir Snorri sem vill mjög gjarnan fá að vísa í Stefán G. Kletta­fjalla­skáld í þessu sam­hengi.

„Mér er vel til allra manna en mér er meinilla við þá strauma sem sumir láta ber­ast með.“

„Ég er ekki alveg jafn góður“

Verður þetta mikið þú að deila þinni sýn á frum­vörp sem þér finnst ömur­leg? 

„Ég hata nátt­úru­lega Alþingi og mér finnst eig­in­lega allt leið­in­legt sem þar ger­ist. Ef mér finnst frum­vörp ömur­leg mun ég segja það,“ segir Snorri sem leggur þó áherslu á að hann muni ávallt hafa lög­mál blaða­mennsk­unnar að leið­ar­ljósi og að hann sé ekki bund­inn neinu ákveðnu póli­tísku afli. 

„Ég er svo­lítið flók­inn póli­tískt séð, ég er ekki svona klass­ískur frjáls­lyndur góður vinstri maður sem er svona ráð­andi fígúra á íslenskum fjöl­miðla­mark­aði. Hann hefur tögl og hagldir á RÚV, Heim­ild­inni, Vísi og Sam­stöð­inni núna. Ég er svona aðeins flókn­ari. Mér líður ekki alveg jafn vel með alla þessa góðu mál­staði. Ég kem aðeins úr annarri átt að þeim.“

FeðgarSnorri Másson, rist­jóri Snorra Mássonar rit­stjóra, og Már Snorra­son 14 mán­aða gam­all. Hér und­ir­búa þeir feðgar það sem nú er orðið að veru­leika: Snorra Másson rit­stjóra.

Þú ert ekki alveg jafn góður? 

„Ég er ekki alveg jafn góður.“

Snorri Másson rit­stjóri er fjár­magn­aður með áskrift­ar­gjöldum, um 2.000 krónum mán­að­ar­lega kjósi fólk að fara þá leið, en Snorri kallar sömu­leiðis á síð­unni sinni eftir stærri styrkjum. 

„Á síð­unni minni er hægt að ger­ast stofn­með­limur og borga smá pen­ing til þess að styrkja mig þar. Það væri mjög vel þegið ef eitt­hvað vont ríkt fólk væri til í það. Ég á ekki erfitt með að taka við pen­ing frá vondu ríku fólki en það þýðir ekki heldur að ég muni segja allt sem vonda ríka fólkið vill að ég segi.“

Mætir örlögum sínum

En eitt­hvað af því kannski? 

„Ef það laumar að mér ein­hverju sem ég er líka sam­mála þá get ég 100% sagt það.“

Treystir þú þér samt til að vera nokkuð hlut­laus þó þú sért með vont ríkt fólk á bak við þig? 

„Ég held að það séu örlög fjöl­miðla­manns­ins að starfa undir vondu ríku fólki. Ég myndi segja að mitt fyr­ir­tæki sé miðað við marga aðra miðla mjög óháð vondu ríku fólki,“ segir Snorri sem er ekki að ráða til sín starfs­fólk í bili en sér fyrir sér að þegar Snorri Másson rit­stjóri verði að fjöl­miðla­veldi gæti hann hætt að kenna mið­il­inn við sjálfan sig og breytt nafni mið­ils­ins í hið smekk­lega og ein­falda heiti: Rit­stjóri.