Sjálfboðaliðar söfnuðu saman líkum þeirra sem létust í flóðum sem fóru um borgina Derna fyrr í mánuðinum. Fólkinu hefur verið komið fyrir í fjöldagröf við borgina. Gríðarleg flóð urðu í borginni eftir að tvær gamlar stíflur brustu aðfaranótt 10. september þegar óveður fór um svæðið.

Flóðin hrifu með sér þúsundir híbýla, sem sum hver enduðu í Miðjarðarhafinu. Staðfest dauðsföll nálgast fjögur þúsund en um níu þúsund er enn saknað. Rauði hálfmáninn í Líbíu segir hins vegar ríflega 11 þúsund látna.

Hundruð mótmælenda í Derna hafa krafist alþjóðlegrar rannsóknar á aðgerðum yfirvalda vegna yfirvofandi hættu í aðdraganda óveðursins, en líka vegna viðbragða þeirra í kjölfar flóðanna.