Taívan fyrst Asíuríkja til að leyfa hjónabönd samkynhneigðra

Taívan varð í dag fyrst ríkja í Asíu til þess að heimila hjónabönd samkynhneigðra en frumvarp þess efnis var samþykkt á þingi Taívan í morgun. Stjórnarskrárdómstóll landsins hafði úrskurðað árið 2017 að fólk af sama kyni ætti rétt á að ganga í hjónaband og var þinginu gefinn tveggja ára frestur til að leiða það í lög. Frá þessu er greint á vef BBC.

Framsæknasta frumvarpið samþykkt

Í nóvember í fyrra var kosið um lögleiðingu hjónabanda fólks af sama kyni í þjóðaratkvæðagreiðsla í Taívan. Þjóðin hafnaði lögleiðingunni en atkvæðagreiðslan var þó ekki bindandi. Þrjú frumvörp voru síðan lögð fram um málefnið á þinginu, tvö frumvarpanna voru á þann veg að samkynhneigðum yrði ekki heimilað að ganga í formlegt hjónaband heldur frekar að gera sáttmála sín á milli. Á endanum var hins vegar framsæknasta frumvarpið samþykkt í þinginu.

Mörg hundruð stuðningsmenn fögnuðu niðurstöðunni fyrir utan þinghúsið í höfuðborginni Taípei í morgun en bar­áttu­fólk fyr­ir rétt­ind­um LGBT-fólks á eyj­unni hef­ur bar­ist fyr­ir jafn­rétti þegar kem­ur að hjóna­bönd­um í mörg ár.

Vonast til þess að fleiri ríki í Asíu fylgi fordæmi Taívan

Í umfjöllun BBC segir að forsvarsmenn mannréttindasamtaka vonast til þess að þessar vendingar í Taívan muni leiða til að fleiri ríki Asíu samþykki sambærileg lög en Taívan hefur lengi leitt baráttu samkynhneigðra í Asíu.

Í september í fyrra úrskurðaði Hæstiréttur Indlands að kynlíf samkynhneigðra væri ekki lengur glæpsamlegt þar í landi. Í Kína eru hjónabönd samkynhneigðra enn ólögleg en síðan 1997 hefur samkynhneigð ekki verið glæpsamleg þar í landi. Í Víetnam eru brúðkaupsveislur samkynhneigðra ekki lengur glæpsamlegar en landið hefur ekki enn lögleitt hjónabönd samkynhneigðra.