Fjölmiðlanefnd hefur komist að þeirri niðurstöðu að Sýn hf. hafi brotið gegn lögum um fjölmiðla með auglýsingum um áfengi annars vegar og auglýsingum um happdrættis- og veðmálastarfsemi hins vegar, en um var að ræða auglýsingar í hlaðvarpsþættinum Þungavigtinni á Vísi.
Tilkynning barst Fjölmiðlanefnd vegna málsins í nóvember á síðasta ári og var athygli nefndarinnar vakin á því að í hlaðvarpsþættinum væru að finna auglýsingar fyrir Viking Lite og Coolbet og tók nefndin málið til athugunar.
Í ákvörðun Fjölmiðlanefndar kemur fram að viðskiptaboð fyrir vörutegundir Viking Lite, Viking Lite Jóla og Viking Lite Lime í hlaðvarpsþættinum á tímabilinu 30. september 2021 til og með 4. janúar 2022 hafi Sýn sem fjölmiðlaveita brotið gegn lögum um fjölmiðla.
Jafnframt var það niðurstaða Fjölmiðlanefndar að auglýsingar í hlaðvarpsþættinum á fatnaði merktum Coolbet væru til þess fallnar að auglýsa veðmálastarfsemina enda hafi umfjöllun um fatnaðinn oft farið fram í tengslum við umfjöllun um veðmál. Nefndin féllst ekki á sjónarmið Sýnar að einingus hafi um verið að ræða auglýsingu á „fatalínu“ Coolbet, og segir í rökstuðningi Fjölmiðlanefndar að þekkt sé að fyrirtæki og aðrir aðilar merki fatnað með vörumerki sínu og nafni í markaðslegum tilgangi. Komst nefndin því að þeirri niðurstöðu að Sýn hafi einnig brotið gegn lögum um fjölmiðla með viðskiptaboðum fyrir happdrættis- og veðmálastarfsemi.
Í tilkynningu frá Fjölmiðlanefnd vegna málsins segir að ekki sé talin ástæða til þess að falla frá sektarákvörðun í málinu, enda hafi Sýn áður brotið gegn lögum um fjölmiðla um bann við viðskiptaboðum fyrir áfengi. Taldi Fjölmiðlanefnd hæfilegt að sektin næmi einni milljón króna.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir