Hjálmar Jónsson, formaður Blaðamannafélags Íslands (BÍ), brást ókvæða við gagnrýni á félagið sem birtist í bakherbergispistli Kjarnans á dögunum. Hjálmari fannst gagnrýni úr bakherberginu, um að lítið hafi heyrst í fagfélagi blaðamanna á jafn róstursömum tímum á fjölmiðlamarkaði, vera ómakleg og hafnaði henni. Gagnrýni blaðamanna í bakherberginu snérist fyrst og síðast að takmarkaðri þátttöku félagsins í faglegri umræðu, en ekki útleigu sumarbústaða eða annarra þátta innan BÍ sem stéttafélags. Á því sviði hefur félagið enda staðið sig að mörgu leyti feykilega vel.
Margir innan bakherbergisins syrgja það hins vegar að formaður BÍ hafi ekki gripið tækifærið sem gafst í kjölfar gagnrýni Kjarnans, til að taka málefnalega umræðu um hlutverk og skyldur blaðamannafélagsins, og hvernig félagið hafi staðið sig í stykkinu.
En minnugir blaðamenn í bakherberginu muna þann tíma þegar blaðamannafélagið lét stundum í sér heyra, og rifjuðu upp af því tilefni heilsíðuauglýsingu sem birtist í Morgunblaðinu 24. mars árið 2005.
[caption id="attachment_16371" align="aligncenter" width="317"] Auglýsing frá Félagi fréttamanna hjá RÚV, sem Blaðamannafélag Íslands studdi.[/caption]
Auglýsinguna má rekja til mjög svo umdeildrar ráðningar Auðuns Georgs Ólafssonar í stöðu fréttastjóra útvarps hjá Ríkisútvarpinu. Ráðningin var pólitísk, enda fimm aðrir umsækjendur um stöðuna metnir hæfari til að gegna henni að teknu tilliti til starfs- og stjórnunarreynslu og menntunar.
Fréttamenn á Ríkisútvarpinu börðust sameinaðir sem einn gegn ráðningunni og nutu til þess stuðnings Blaðamannafélags Íslands. Eins og flestir vita skilaði barátta þeirra árangri, því aldrei tók Auðun Georg við stöðunni.
Í bakherberginu finnst mörgum blaðamanninum að sambærilegar aðstæður séu uppi á Íslandi í dag, og velta því fyrir sér hvort ekki hafi verið fullt tilefni til fyrir blaðamannafélagið að styðja í verki félagsmenn sína. Sérhagsmunaöfl sem sjá hag sinn í að stýra umræðu hafa tekið yfir hvern fjölmiðilinn á fætur öðrum, starfsumhverfi blaðamanna fer hrakandi með hverju árinu og starfsöryggi þeirra er með því lakasta sem fyrir finnst. Það er því öskrandi þörf á að fagfélag blaðamanna láti kröftulega í sér heyra og beiti sér til að bæta aðstæður skjólstæðinga sinna. En Blaðamannafélag Íslands velur þess í stað að þegja um ástandið. Eina sem frá því heyrist er gagnrýni á þá félagsmenn þess sem gagnrýna þögnina.
Að gefnu tilefni er vert að ítreka að bakherbergið er á ábyrgð ritstjóra Kjarnans. Öll frekari gagnrýni forsvarsmanna BÍ má því beinast beint að honum, leiðist þeim nafnleysið.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir