Gjöf upp á 840 milljónir - Fyrsta skóflustungan tekin að húsi jáeindaskanna

Páll Matth­í­as­son, for­stjóri Land­spít­ala, tók í dag fyrstu skóflustung­una að hús­næði sem mun hýsa nýjan jáeindaskanna. Íslensk erfða­grein­ing færði íslensku þjóð­inni skann­ann að gjöf sem og allan til­heyr­andi tækja­kost og sér­hæft hús­næði undir hann. Verðmæti gjaf­ar­innar er rúmar 840 millj­ónir króna, að því er segir í til­kynn­ingu.

Flókinn og umfangs­mik­ill bún­aður fylgir skann­anum, svo sem öreinda­hrað­all sem fram­leiðir geisla­virk efni sem leita í sjúka vefi lík­am­ans. Jáeindas­kanni er oft­ast not­aður í krabba­meins­með­ferðum en hann er einnig hægt að nýta í tauga-, hjarta- og gigt­lækn­ingum.

Húsnæðið verður byggt við Land­spít­ala á Hring­braut, aðlægt skyldri starf­semi til að ná sem mestri skil­virkni og þæg­indum fyrir sjúk­linga. Gert er ráð fyrir að hús­næðið verði til­búið í sept­em­ber en þá verður skann­anum og bún­aði komið fyrir og hann prufu­keyrður. Áætlað er að skann­inn verði kom­inn í notkun um næstu ára­mót.

Markar tímamót við greiningu sjúkdóma

Jáeindas­kanni hefur ekki verið til á Íslandi en nýr skanni mun valda bylt­ingu í grein­ingu og með­ferð sjúk­dóma, sam­kvæmt til­kynn­ing­unni. „Árlega hafa um 200 sjúk­lingar farið í jáeindaskanna til Dan­merkur en áætlað er að um 2.000 manns muni fara í skann­ann hér á landi á ári hverju. Jáeindas­kanni gefur nákvæmar upp­lýs­ingar um stað­setn­ingu og dreif­ingu krabba­meina. Með slíkar upp­lýs­ingar er hægt að gera geisla­með­ferð mark­viss­ari og fækka óþarfa skurð­að­gerðum. Skanninn mun gefa betri upp­lýs­ingar um útbreiðslu sjúk­dóma hjá um þriðj­ungi sjúk­linga og mun þar af leið­andi breyta með­ferð þeirra tölu­vert. Með mark­viss­ari með­ferð minnka auka­verk­anir og bata­horfur aukast. Að auki verður hægt að greina hvernig sjúk­dómar bregð­ast við með­ferð og því hægt að grípa fyrr inn í ef gera þarf breyt­ingar á með­ferð­inni. Að lokum mun jáeindas­kann­inn nýt­ast vel við rann­sóknar- og vís­inda­starf á Íslandi en hann er í dag orð­inn sjálf­sagður hluti af rann­sókn­ar­að­ferðum við marga sjúk­dóma,“ segir í til­kynn­ing­unni.