Ísland og Bretland hafa náð samkomulagi um að halda óbreyttum forsendum í milliríkjaviðskiptum fari svo að Bretland yfirgefi Evrópusambandið án samnings.
Þetta staðfestir Guðlaugur Þór Þórðarson utanríkisráðherra við mbl.is.
Ísland hefur í gegnum tíðina verið í miklum viðskiptum við Bretland, einkum á sviði sjávarútvegs.
Samningurinn gerir ráð fyrir að ákvæði EES-samningsins sem snúa að viðskiptum milli ríkjanna verði óbreytt, segir í umfjöllun mbl.is, en sambærilegur samningur hefur verið gerður við Noreg.
Þannig verður engin breyting á gildandi tollum, né heldur tollalausum viðskiptum iðnaðarvara. Þá verða kvótar fyrir tollfrjáls viðskipti með landbúnaðar- og sjávarútvegsafurðir einnig óbreyttir. Samningurinn nær ekki til þjónustuviðskipta.
Í samtali við mbl.is segir Guðlaugur Þór að vinnan hafi gengið vel, og viðbrögð Breta verið jákvæð.
Ekki liggur ljóst fyrir í hvaða farveg Brexit mál fara nú í breska þinginu, en samkvæmt lögum á Bretland að yfirgefa Evrópusambandið 29. mars næstkomandi. Í tvígang hefur Brexit-samningi Theresu May, forsætisráðherra, verið hafnað og John Bercow, þingforseti í Bretlandi, hefur sagt að samningur verður ekki borinn upp til atkvæðis nema hann taki verulegum breytingum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir