Vefsíða kvenhatara notar íslenskt lén

Umræðu­vef­síða hóps karl­manna sem kalla sig „incels“ er tíma­bundið hýst á íslensku léni. Incels eru hópur karl­manna sem hat­ast á við konur og tala sumir hverjir fyrir ofbeldi gegn þeim. Slóðin sem hefur í tæpt ár verið incels.me er nú óvirk, en þess í stað er hægt að nálg­ast síð­una á slóð­inni incels.is. Við komu á síð­una birt­ist aug­lýs­ing þar sem not­endur eru hvattir til að nota incels.is í stað incels.me þangað til annað kemur fram.

Hópurinn sem á íslensku er hægt að kalla „skír­lífir gegn eigin vilja“  stundar grimmi­lega hat­urs­orð­ræðu í garð kvenna á net­inu. Menn­irnir telja að skír­lífi þeirra sé sök kvenna sem sækja frekar í aðlað­andi karl­menn, í stað þess að sækja í menn sem eru góð­hjart­aðir en ekki eins aðlað­andi.

Umrædd síða er ein af síð­ustu spjall­svæðum incels-liða sem hýst er á net­inu í dag, en vegna stöðugra ábend­inga aðgerða­sinna til hýs­ing­ar­að­ila hefur umræðu­vef­síðum þeirra verið lokað. Þetta útskýrir breyt­ing­una á vef­hýs­ing­unni, hóp­ur­inn hefur að öllum lík­indum breytt um lén til að forð­ast lokun. Vefsíðan er hýst í Þýska­landi en breyt­ingin átti sér stað í lok sept­em­ber. Lén með end­ing­unni .is kostar 5.980 krónur á ári. 

Undir högg að sækja

Hópurinn hefur verið mjög virkur frá eig­in­legri stofnun sinni árið 2012. Þeir héldu sig aðal­lega á sam­fé­lags­miðl­inum Reddit þangað til sam­fé­lagi þeirra þar var lokað vegna hat­urs­orð­ræðu í nóv­em­ber 2017. 

Í dag má finna incels-hóp­inn í öllum kimum inter­nets­ins, þar á meðal á djúpa vefnum sem ekki er öllum aðgengi­legur. Síður þeirra eiga undir högg að sækja vegna aðgerða­sinna sem berj­ast gegn hat­urs­orð­ræðu þeirra. Þannig var öðru spjall­svæði þeirra sem hýst var á lén­inu .life lokað vegna ábend­inga aðgerða­sinna til hýs­ing­ar­að­il­ans. Þetta gerð­ist í febr­úar síð­ast­liðnum, en þá var kyn­ferð­is­af­brota­mað­ur­inn Larry Nassar fyrir dóm­sólum vegna brota hans gegn stúlkum undir lög­aldri. Á vef­síð­unni var hann tal­inn hetja. Samn­ingnum um hýs­ingu var rift eftir ábend­ing­arnar. 

^{Incels-liðar hafa framið í það minnsta tvö fjöldamorð}

Árið 2014 myrti Elliot Rodger sjö manns í Kali­forníu, áður en hann framdi sjálfs­víg, undir sókn lög­reglu. Rodger var incel og nokkuð virkur á spjall­svæðum þeirra. Hann hélt einnig úti YouTube síðu þar sem hann tal­aði um reiði sína í garð kvenna vegna óvilja þeirra til að vera með honum.

Í maí 2018 keyrði Alek Minassian sendi­ferða­bíl í hóp fólks í Torontó, með þeim afleið­ingum að tíu manns létu lífið. Við hand­töku reyndi Minassian að ögra lög­reglu­mönnum til að skjóta sig til bana. Hann var hand­tek­inn og bíður dóms.

Markmið hans var að gera eins og Elliot Rodger og er það vin­sæl umræða á spjall­svæðum incels að láta sig dreyma um að „gera eins og ER“ eða „gera eins og Elliot Rodger“. Rodger er í guða­tölu í hugum incels vegna hug­rekkis síns.