Streymi Upplýsingafundir um Covid-19

Aðgerðir á landamærunum ekki of mikið inngrip í frelsi fólks

Þórólfur Guðnason sóttvarnalæknir segir að stærstan hluta þeirra smita sem greinst hafa utan sóttkvíar síðust daga megi rekja til ferðamanna sem ekki héldu sóttkví. Hertar aðgerðir á landamærunum og skikkan fólks til dvalar í farsóttarhúsum séu viðbrögð við því.

Deila

Freyr Rögnvaldsson

Lýsingu lokið Nýjasta færsla kl. 11:26

11:26 31. mars

Mun fylgjast með yfir páskana og meta hverni skólastarfi verður háttað

Hvað varðar skólastarf og ákvarðanir um hvernig því verði háttað segir Þórólfur að ný reglugerð þar um þurfi að taka gildi 1. apríl og von sé á henni. Hann muni hins vegar fylgjast með þróun mála yfir páskana og sú þróun mun ráða því hvort hann leggi fram nýjar tillögur í þeim efnum.

11:21 31. mars

Aðgerðirnar ekki of mikið inngrip í frelsi fólks segir Þórólfur

Spurður hvort að það að skylda alla til dvalar í sóttvarnarhúsi sé ekki of mikið inngrip í frelsi fólks segir Þórólfu að hann telji svo ekki vera. Verið sé að bregðast til við því að fólk hafi ekki virt sóttkví við komuna til landsins og verið sé að bregðast við því.

11:20 31. mars

Engar vísbendingar um smit á gossvæðinu

Ekki hefur tekist að sýna fram á tengsl milli þeirra fimm sem greindust smitaðir í gær utan sóttkvíar. Þórólfur segir aðspurður að ekki séu vísbendingar um að þau smit tengist för fólks á eldstöðvarnar við Fagradalsfjall.

11:18 31. mars

Bóluefni fyrir 80 þúsund manns verði komið í lok apríl

Bólusetning gengur ágætlega og segir Þórólfur líkur á að meira magn bóluefnis komi til landsins á næstu vikum. Í lok apríl verði hingað til lands komið bóluefni sem dugi til að fullbólusetja um 80 þúsund manns.

11:16 31. mars

Telur að hægt verði að komast fyrir hópsmit á næstu tveimur vikum

Þórólfur telur að miðað við núverandi aðgerðir ætti að vera hægt að komast fyrir þær hópsýkingar sem við nú glímum við á næstu einni til tveimur vikum. Hann brýnir fólk til að sinna sínum sóttvörnum og fari í sýnatöku þegar ef að grunur leikur á hugsanlegu smiti. Hann lýsir ánægju sinni með nýjustu reglugerði heilbrigðisráðherra um aðgerðir á landamærunum og hefur von til þess að með þeim takist að komast fyrir þá veikleika sem hafa verið í fyrirkomulaginu á landamærunum.

11:13 31. mars

Einn á Landspítala

Einn liggur nú inni á Landspítala vegna Covid en almennt er staðan á sjúkrahúsum nokkuð góð. Þórólfur segir hins vegar ekki ólíklegt að fleiri verði alvarlega veikir á næstu tveimur vikum.

11:11 31. mars

Sex greinst á landamærunum undanfarna daga

Á landamærunum hafa sex manns greinst með virk smit síðust sex daga, einn í fyrri skimun og fimm í síðari skimun. Hertar aðgerðir munu standa að minnsta kosti til 15. apríl, eins og núverandi reglugerð segir til um.

11:10 31. mars

Erfiðlega gengur að rekja smitin

Erfiðlega hefur gengið að rekja smit og eru líkur til þess að fjölga muni í hópi þeirra sem smitast og eru utan sóttkvíar. Ekki er að finna tengsl á milli þeirra aðila sem greindust utan sóttkvíar í gær. Þórólfur segir ljóst að enn sé ekki búið að ná utan um samfélagsmit.

11:08 31. mars

Átta smit í gær og aðeins þrír í sóttkví

Átta greindust með Covid-19 veiruna innalands og voru aðeins þrír í sóttkví. Smitin greindust á Suðvesturhorninu og á Suðurlandi. 38 manns hafa greinst innanlands frá því að aðgerðir voru hertar og voru 28 manns í sóttkví við greiningu. Öll smitin eru afbrigði af bresku veirunni. Stærstan hluta þeirra sem greinst hafa utan sóttkvíar má rekja til ferðamanna sem greindust við seinni skimun og virðast hafa farið óvarlega í sinni fimm daga sóttkví, að sögn Þórólfs Guðnasonar sóttvarnarlæknis.

Kjósa

Hvernig finnst þér þessi grein? Skráðu þig inn til að kjósa.

Veistu meira? Láttu okkur vita

Deila

Höfundur

Freyr Rögnvaldsson

Greinaröð

Upplýsingafundir um Covid-19

Athugasemdir

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir.

Tengdar greinar