Lokað verður fyrir bílaumferð á neðri hluta Laugavegs og Skólavörðustígs um helgar í desember og alfarið frá 18. desember til aðfangadags. Umhverfis- og skipulagsráð Reykjavíkurborgar samþykkti þetta í gær en málið bíður staðfestingar borgarráðs. Borgarráð tekur málið til umfjöllunar í næstu viku en í millitíðinni verður haldinn fundur með hagsmunaaðilum.
Fyrirkomulagið verður með sama hætti og göngugötur í miðborginni á sumrin, og opið verður fyrir vöruafgreiðslu á morgnanna.
Júlíus Vífill Ingvarsson, fulltrúi Sjálfstæðisflokksins í umhverfis- og skipulagsráði, sat hjá við afgreiðslu málsins og gagnrýndi það. „Þær viðvörunarraddir hafa heyrst frá kaupmönnum að lokun Laugavegar á aðventunni muni draga úr verslun. Samtök kaupmanna á svæðinu hafa óskað eftir fundi um málið en slíkur fundur hefur ekki verið haldinn og er það miður,“ sagði hann í bókun sinni um málið. Stjórnvald ætti ekki að taka ákvarðanir sem hópur fólks telji vera íþyngjandi, nema leitað sé eftir formlegu áliti og röksemdum.
Fulltrúar meirihlutans í borginni sögðu þvert á móti að með því opnun göngugatna sé í þágu allrar starfsemi í miðborginni. „Enda hefur nýleg könnun borgarinnar leitt í ljós að yfirgnæfandi meirihluti rekstraraðila sé jákvæður fyrir göngugötum á aðventunni.“
Júlíus Vífill sagði að með þessu hafi meirihluti ráðsins viðurkenna skort á samráði, en meirihlutinn sagði að komið hafi verið til móts við áhyggjur um undirbúningstíma og fjölda opnunardaga.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir