Hann var hlát­ur­mildur og ham­ingju­samur í starfi. Sam­starfs­fólk hans lýsti honum sem „hjarta og sál“ hót­els­ins. Ástríða hans í líf­inu var að vera morg­un­verð­ar­kokkur. En þetta átti eftir að breyt­ast hratt. „Það slökkn­aði á eld­móði hans fyrir líf­inu,“ segir vinnu­fé­lagi hans. Síðasta haust reyndi hann að svipta sig lífi. Hann rekur van­líðan sína til breyt­inga í vinnu­um­hverfi hans. „Ég elskaði þessa vinnu svo mikið, en hún var orðin að martröð,“ segir hann.

Stundin ræddi við kokk­inn  Joao Paulo De Brito Linheiro Da Silva, eða Paulo eins og hann er kall­aður, ásamt fimm sam­starfs­mönnum hans á fjög­urra stjörnu hót­el­inu Radisson Blu 1919 í mið­borg Reykja­víkur. Starfs­menn hafa kvartað undan því að fá sjaldn­ast rétt útborgað og greina frá nið­ur­brjót­andi fram­komu yfir­manna í þeirra garð. Öllu morg­un­verð­ar­starfs­fólk­inu á vakt Paulo var sagt upp með til­boði um skertan vinnu­tíma og verri kjör.

Öll eru þau sam­mála um að starfs­að­stæðum hafi farið hrak­andi eftir að nýr hót­el­stjóri var ráð­inn síð­ast­liðið haust. Rekstur hót­els­ins hefur gengið mis­jafn­lega, en árið 2017 var það rekið með sjö millj­óna króna tapi sam­an­borið­við 38 millj­óna króna hagn­aði árið áður.