Viðskiptaráð stendur fyrir Viðskiptaþingi í næstu viku. Þar munu nokkrir ræðumenn halda framsögur, meðal annars Sigmundur Davíð Gunnlaugsson forsætisráðherra. Í pallborði á þinginu munu leiðtogar stjórnmálaflokkanna svo ræða íslenska umræðuhefð og áhrif hennar á innleiðingu breytinga, að því er fram kemur í auglýsingu fyrir viðburðinn. Íslensk umræðuhefð hefur lengi verið forsætisráðherranum mjög hugleikin. Nú síðast tjáði hann sig um umræðuna í tengslum við fjarveru hans á samstöðufundi vegna hryðjuverkanna í París, en hann sagði umræðu oft vera leidda „út í móa“ og hún allt of yfirborðskennd. Hann hefur líka sagt að það sé ástæða fyrir alla að hafa áhyggjur af þróun þjóðfélagsumræðunnar, í tengslum við lekamálið, og í stefnuræðu sinni í þinginu í haust harmaði hann að hér á landi ríkti „umræðuhefð sem sífellt beinir spjótum sínum að hinu neikvæða“.
Vegna þess hversu tíðrætt forsætisráðherra er um umræðuna á Íslandi vekur það athygli að samkvæmt auglýsingu Viðskiptaráðs um atburðinn ætlar hann ekki að staldra við á Viðskiptaþingi eftir ræðu sína og taka þátt í pallborðsumræðunum, heldur hyggst hann senda Sigurð Inga Jóhannsson sjávarútvegs- og landbúnaðarráðherra sem fulltrúa Framsóknarflokksins.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir