Eiríkur hefur rannsakað ýmislegt í starfi sínu sem þjóðfræðingur en meistararitgerðin hans fjallaði um alþýðlegar veðurspár og bar heitið: Á veðramótum: Íslenskar veðurspár og veðurþekking þjóðarinnar fyrr og nú. Eitthvað verður til þess að Íslendingar eru alltaf að tala um veðrið en Eiríkur segir okkur einnig frá því hvaða áhrif loftslagsbreytingar hafa á veðurskilning og hvaða þýðingu það hefur að vera veðurglöggur og með gott veðurminni. Eiríkur heldur úti Facebook hópnum Alþýðlegar veðurspár þar sem hann og fleiri deila ýmsum fróðleik um þetta eilíðarviðfangsefni Íslendinga, veðrið.

Eiríkur hefur rannsakað ýmislegt fleira líkt og þjóðtrú vesturfara, dagbækur frá fyrri tímum og tilfinninglíf fátæks bónda á 19. öld en einnig sinnt fjölbreyttu starfi fyrir Þjóðfræðistofu. 

Eiríkur vakti mikla athygli fyrir fyrirlestur sinn um tengdamæður á Þjóðarspegli, ráðstefnu um rannsóknir í félagsvísindum, síðast liðið haust. Eiríkur segir frá því hvernig þessi húmor um tengdamömmur lýsir sér og af hverju virðist hann hafa þrifist svo vel um tíma, á grínsíðum allra helstu dagblaða. 

Þjóðhættir er hlaðvarp sem fjallar um nýjar rannsóknir og fjölbreytta miðlun í þjóðfræði. Umsjón hafa dr. Dagrún Ósk Jónsdóttir, kennari í þjóðfræði við Háskóla Íslands og Sigurlaug Dagsdóttir, verkefnisstýra vefsins Lifandi hefðir hjá Þjóðminjasafni Íslands.