Kári segir okkur frá efni BA ritgerðarinnar sinnar sem fjallaði um „hlautbolla“ en orðið sjálft er eitthvað sem við heyrum ekki á hverjum degi. Kári segir okkur frá því hvaða fyrirbæri þetta er og hvernig fornleifar og frásagnir geta sagt okkur ýmislegt um heim sem er okkur fjarlægur.

Í meistararitgerð sinni kafaði Kári ofan í Gísla sögu Súrssonar og leit þá sérstaklega til þess hvaða heimildir er þar að finna um trúarheim og helgisiði heiðinna trúarbragða. Eru þetta heimildir sem gætu hafa varðveist í munnlegri geymd og lýsa trúarheimi og siðum sem eitt sinn tíðkuðust eða eru þær frekar birtingarmynd á hugmyndum sagnaritarans um fortíðina? Kári segir okkur frá þeim þemum sem hann skoðaði sérstaklega; fóstbræðralagi, draumkonum, helskóm og þeim sið að binda skip. Kári bar heimildir Gísla sögu saman við aðrar heimildir; fornleifafræði, miðaldabókmenntir, þjóðsögur og þjóðtrú seinni tíma og dró upp mynd af þeim siðum sem um ræðir. Einnig segir Kári okkur frá sérstakri persónu sem má finna í Gísla Sögu Súrssonar, honum Þorgrími nef sem lifði á jaðri samfélagsins og stundaði seið en hefndist fyrir það. 

Kári hefur haldið áfram að skoða heimildir sem tengjast trúarhugmyndum fortíðar og hefur nýlega gefið út bókina The Galdrabók: Forbidden Icelandic Folk Magic en í henni má finna tvö handrit, annars vegar Galdrabók og hins vegar handriti sem Kári kallar Jarðskinnu, auk margvíslegra upplýsinga um galdra og samhengi þeirra. Kári segir okkur frá þessum dularfullu handritum en eitt þeirra virðist vera leiðarvísir að því hvernig má eiga í samskiptum við huldufólk. 

Þjóðhættir er hlaðvarp sem fjallar um nýjar rannsóknir og fjölbreytta miðlun í þjóðfræði. Umsjón hafa dr. Dagrún Ósk Jónsdóttir, kennari í þjóðfræði við Háskóla Íslands og Sigurlaug Dagsdóttir, verkefnisstýra vefsins Lifandi hefðir hjá Þjóðminjasafni Íslands.