Útlit viðmóts

Ljóst

Dökkt

Stofnuð árið 2023 af Stundinni og Kjarnanum

« Síðasta síða Síða 3 af 14 Næsta síða »

Mynd dagsins

Páll Stefánsson

Hjóla í mann og annan

Reykjavíkurhringurinn, hjólastígaleiðin meðfram strandlengjunni, með viðkomu vestur á Seltjarnarnesi, er 27 kílómetra langur. Ef maður bætir örlitlu við, skreppur út á Álftanes fyrir Kársnesið og síðan Flóttamannaleiðina niður í Elliðaárdal til baka, bætast bara 44 kílómetrar við. Hlutfall hjólandi í umferðinni er núna um 7%. Samkvæmt samgönguáætlun Reykjavíkurborgar er stefnt að því að tvöfalda hjólaumferð á næstu tíu árum.

Mynd dagsins

Páll Stefánsson

Nafnlausi dalurinn fyllist fljótt

Sprengivirkni hefur aukist mikið undanfarinn sólarhring í syðstu gígunum á Fagradalsfjalli - það sá ég vel í sjöttu ferð minni á gosstöðvarnar í gærkvöldi. Rennur því nú nær allt hraun austur í nafnlausa dalinn sunnan Merardala og gæti hann því fyllst mjög fljótt að mati vísindamanna. Flatarmál hraunsins er í dag er orðið 1,13 km². Á fyrri myndinni sjást borgarbúar að ganga á Borgarfjall til að sjá betur yfir gosstöðvarnar, seinni myndin er næst syðsti gígurinn, sem er lang öflugastur núna.

Mynd dagsins

Páll Stefánsson

Morgunhani við hafnarkjaftinn

Mynd dagsins

Páll Stefánsson

Falco Rusticolus

Íslenski fálkinn hefur verið alfriðaður síðan 1940, enda er stofnstærðin bara um 350 pör. Fyrr á öldum var hann ein verðmætasta útflutningsvara landsins. Fálkinn var þá eign Danakonungs og þóttu þeir allra fálka fremstir til veiða hjá evrópska aðlinum. Þennan fallega fálka hitti ég í morgun þar sem hann er í hvíldarinnlögn í Fjölskyldu- og húsdýragarðinum, með skaddaðan væng.

Mynd dagsins

Páll Stefánsson

Gleðilegt sumar á degi jarðar

Í nótt fraus saman sumar og vetur við Mývatn, sem samkvæmt íslenskri þjóðtrú boðar gott sumar þar. Sumardaginn fyrsta ber alltaf upp á fimmtudegi frá 19.-25. apríl. Dagur jarðar er hinsvegar alltaf þann 22. apríl. Sá dagur hefur verið helgaður umhverfismálum og verið haldinn hátíðlegur síðan 1970. Í ár eru það loftlagsmálin sem sett eru á oddinn. Myndin, fyrstu blómin í Grasagarðinum, var tekin í Laugardal nú í morgun.

Mynd dagsins

Páll Stefánsson

Vetur konungur kveður

Konungurinn Jóhannes III var í morgun ásamt 192 skólafélögum sínum í MR að dimmitera. Fyrir þá sem gerðu ekki þá tengingu hefur miðborgin virkað sem hættulegur staður fyrir gesti og gangandi, því á ferli voru; pörupiltar, fangar, álfar, lifandi bjórlíki, englar, djöflar, týrólskir túristar og óárennilegir atvinnulausir byggingaverkamenn í stórum hópum.

Mynd dagsins

Páll Stefánsson

Katrín og Bjarni í bakgrunni

Þegar blaðamannafundur ríkisstjórnarinnar í hófst í Hörpu um hertar reglur á landamærunum voru hér 1.557 einstaklingar í sóttkví eða einangrun. Nýju reglurnar skikka nú alla farþega frá hásmitsvæðum í sóttkví á sóttvarnarhótelum. Þar á meðal alla farþega frá fjórum Evrópulöndum: Hollandi, Frakklandi, Ungverjalandi og Póllandi. Litakóðunarkerfið sem átti að taka gildi á landamærunum 1 maí verður síðan frestað um mánuð.

Mynd dagsins

Páll Stefánsson

Engin Jörfagleði í dag

Í morgun var ansi hljótt fyrir utan leikskólann Jörfa, enda hafa 16 starfsmenn af rúmlega þrjátíu og 14 börn greinst smituð af Covid-19. Um næstu mánaðamót mun allt leikskólastarfsfólk verða bólusett. Hin eina og sanna Jörfagleði var vikivakadansleikur seint á 17. öld sem haldinn var á bænum Jörfa í Dalasýslu, þar til sýslumaðurinn Björn Jónsson tók sig til og bannaði hann árið 1695, vegna sögusagna um siðleysi. En árinu áður höfðu 30 börn komið undir á samkomunni og erfitt reyndist að para feður við anga.

Mynd dagsins

Páll Stefánsson

Hettu- og hanskaveður í miðbænum

Ziva (mynd) sem ég mætti af tilviljun á Laugaveginum, á leiðinni í vinnuna. Hún kemur frá Tékklandi (Czechia) og hefur búið hér og starfað í tvö ár sem húðflúrari. „Lífið hér er að komast í eðlilegt horf... svona næstum því, sem er frábært". Já eins og veðrið í morgun. Ekta apríl: sól, rok og rigning allt á sömu mínútunni.

Mynd dagsins

Páll Stefánsson

Blómlegt blómabú

„Við ræktum hér meira en 3 milljónir blóma á hverju ári,“ segir Áslaug Sveinbjarnardóttir ein af garðyrkjubændunum á Espiflöt í Reykholti. Það gera tæp 10 blóm á hvern einstakling hér í lýðveldinu. „Covid hefur haft áhrif, fólk kaupir meira af blómum, vill hafa heimilið hlýlegra þegar það er svona mikið heima. Pottablómasala hefur líka aukist til muna, en hér erum við bara í afskornum blómum.“

Mynd dagsins

Páll Stefánsson

Hvað getur maður sagt?

...maður verður bara orðlaus yfir duttlungum, fegurð og krafti náttúrunnar.

Mynd dagsins

Páll Stefánsson

Ótrúlega venjulegur þriðjudagsmorgun

Það er svo gefandi að vakna með borginni og hitta alla menningarpáfa lýðveldisins fyrir utan Kaffifélagið á Skólavörðustíg. Á meðan þeir skeggræddu var einhver sem sönglaði hástöfum niður í Bankastræti. Niður við Tjörn var Bryndísa (mynd) að bíða eftir vinkonu sinni, en þær ætluðu að fara að æfa saman sirkus. Þegar ég gekk svo upp Amtmannstíginn rakst ég á húðflúrsmeistarann Jón Páll (mynd) að mynda viðskiptavin beran að ofan á miðri götunni. Já, ósköp venjulegur þriðjudagsmorgun í höfuðborginni.

« Síðasta síða Síða 3 af 14 Næsta síða »