Ríkisstjórn Íslands hefur boðað minni aukningu ríkisútgjalda og lækkun skatta til að bregðast við efnahagsskellinum vegna COVID-19 veirunnar heldur en Danmörk og Þýskaland. Þá er heildarumfang brúarlána til fyrirtækja, sem íslenska ríkið ábyrgist allt að 70 prósent af, minna en lánafyrirgreiðslurnar sem stjórnvöld flestra nágrannalanda ætla að tryggja fyrirtækjum í rekstrarörðugleikum. 

„Ég ætla bara að lýsa þeirri skoðun minni að þessar aðgerðir sem við höfum gripið til eru að öllum líkindum ekki nóg,“ sagði Bjarni Benediktsson fjármálaráðherra í óundirbúnum fyrirspurnatíma á Alþingi á fimmtudag og bætti því við að hið opinbera þyrfti að stíga enn stærri skref til að bregðast við samdrættinum vegna faraldursins. Á mánudag greindi Katrín Jakobsdóttir forsætisráðherra svo frá því að frekari aðgerða væri að vænta eftir páska. Gríðarlegur fjöldi umsókna um atvinnuleysisbætur samhliða minnkuðu starfshlutfalli og fyrirheit um framlengingu hlutabótaúrræðisins benda jafnframt til þess að útgjöld ríkisins vegna þegar samþykktra aðgerða verði enn meiri en gert …