Rósa hefur einnig unnið viðamiklar rannsóknir á ævintýrum, meðal annars sem finnast í hljóðritasafninu og skoðaði þá hvernig umhverfi og lífshlaup sagnafólks getur haft áhrif á þjóðsögur og ævintýri sem það segir.

Í því samhengi hefur Rósa nýlega unnið rannsókn á því hvort að metoo byltingin hafi haft áhrif á hvernig ævintýri eru sögð. Hugmyndin að baki rannsókninni er sprottin upp úr leiksýningum sem hún hefur farið á undanfarið þar sem gömul ævintýri eru notuð sem innblástur eða sett í nýjan búning. Rósa skoðaði þá líka hvernig sagnkonur fortíðarinnar hafa sagt sögur og komst að því að það er alls ekki nýtt af nálinni að sögur séu aðlagaðar til að vera valdeflandi fyrir stúlkur.

Rósa, ásamt þjóðfræðingnum Trausta Dagssyni, er einnig að hefja spennandi rannsókn á þjóðsagnasafni Baldvins Jónatanssonar úr Þingeyjarsýslu og segir okkur frá því.

Þjóðhættir er hlaðvarp sem fjallar um nýjar rannsóknir og fjölbreytta miðlun í þjóðfræði. Umsjón hafa dr. Dagrún Ósk Jónsdóttir, kennari í þjóðfræði við Háskóla Íslands og Sigurlaug Dagsdóttir, verkefnisstýra vefsins Lifandi hefðir hjá Þjóðminjasafni Íslands.