Í þættinum er rætt við Rakel Jónsdóttur þjóðfræðing um hvað leiddi hana inn á brautir þjóðfræðinnar og hvaða áhrif myndlistabakgrunnur hennar hafði á viðhorf hennar og viðfangsefni. Rakel segir okkur frá því hvernig hún hóf rannsóknir sínar á matarmenningu og hvernig hún hefur síðan rannsakað efnið út frá ótal mismunandi sjónarhornum.

Sem lokaverkefni í þjóðfræði vann Rakel heimildamynd sem ber yfirskriftina Samkenndarskápar og hlaut verðlaun á Stockfish kvikmyndahátíðinni í flokki stuttmynda. Þar fjallaði hún um frískápa sem nú skjóta upp kollinum víða í þéttbýli á Íslandi. Þar deilir fólk mat með einhverjum sem það hefur aldrei hitt. Í stuttmyndinni fengu frískáparnir að vera í miðdepli sem hreyfiaflið sem keyrir ört stækkandi samfélag þessarar menningar.

Þjóðhættir er hlaðvarp sem fjallar um nýjar rannsóknir og fjölbreytta miðlun í þjóðfræði. Umsjón hafa dr. Dagrún Ósk Jónsdóttir, kennari í þjóðfræði við Háskóla Íslands og Sigurlaug Dagsdóttir, verkefnisstýra vefsins Lifandi hefðir hjá Þjóðminjasafni Íslands.