Viðtal við Elías Pétursson, bróður Lúðvíks Péturssonar, verður sýnt í fyrri hluta Pressu í dag.  Elías segir meðal annars að enginn af þeim sem kom að ákvörðunum eða bar ábyrgð á málum í Grindavík þegar slysið átti sér stað hafi sett sig í samband við ástvini Lúðvíks eftir að leit að honum var hætt. Hann segir að fjölskyldan telji rétt að ræða málið, reifa sín sjónarmið. Þau telji að það þurfi að fá fram atburðarásina og hvernig þetta gat gerst. Ósvöruðum spurningum þeirra, sem hafi bara fjölgað, þurfi að svara með óháðri rannsókn.

Í seinni hluta þáttarins tölum við um bjargarleysi fíknisjúklinga sem bíða eftir að komast í afvötnun eða meðferð. Aðstandendur nokkurra þeirra segja í Heimildinni í dag að bráðafíknimóttaka gæti bjargað mannslífum. Rætt var um slíkt úrræði á Alþingi á dögunum þar sem Sigmar Guðmundsson, þingmaður Viðreisnar sagði að á Íslandi væru alltof mörg dæmi um að fólk með fíknivanda deyi meðan það bíði eftir að fá hjálp.

Í Heimildinni í dag er rætt við tvær konur sem misstu ástvini í fyrra meðan þau biðu eftir að komast í meðferð.  Til að ræða þetta koma í þáttinn þær Valgerður Rúnarsdóttir, forstjóri sjúkrahússins Vogs, Dagbjört Ósk Steindórsdóttir sem er móðir langsveiks fíknisjúklings og formaður stjórnar Samtaka aðstandenda og fíknisjúkra og Rúna Ágústsdóttir, ráðgjafi hjá Foreldrahúsi.