Síðast liðið sumar fengu þjóðfræðingarnir Kristín Dögg Kristinsdóttir og Þórunn Valdís Þórsdóttir styrk frá Nýsköpunarsjóði námsmanna til að rannsaka þjóðtrú í samtímanum. Rannsóknin byggir á þjóðtrúarkönnun sem send var út af Terry Gunnell prófessor í þjóðfræði og Félagsvísindastofnun árið 2023, þar sem bæði var spurt út í trú og reynslu af hinu yfirnáttúrulega.

Kristín og Þórunn segja frá rannsókninni, en síðastliðið sumar tóku þær viðtöl við 22 einstaklinga með fjölbreytta reynslu til dæmis af hugboðum, berdreymi, huldufólki, reimleikum og hinum framliðnu. Þær hafa í framhaldinu lagt sérstaka áherslu á skynjun og reynslu fólks af návist framliðinna. Reynsla viðmælenda þeirra er fjölbreytt, sum sjá framliðna með eigin augum, önnur heyra, finna lykt eða fá ákveðna tilfinningu. Þær ræða einnig um túlkun viðmælenda sinna á næmni og vangaveltur um hvort fólk sé mis næmt.

Kristín og Þórunn munu kynna niðurstöður rannsóknarinnar á Þjóðarspegli, ráðstefnu Félagsvísindasviðs við Háskóla Íslands þann 31. október næst komandi.