Þar rannsakaði Sæbjörg hvað felst í svæðivitund þeirra sem búsettir eru á Flateyri og samskipti ólíkra hópa samfélagsins. Sæbjörg hefur enn gaman að því að velta fyrir sér samfélaginu sem hún býr í og hvað hefur áhrif á viðhorf íbúanna þar.

Sæbjörg segir einnig frá fjölbreyttum verkefnum sem hún hefur fengist við eftir að hún kláraði nám sitt í þjóðfræði þar sem nýsköpun og nýting á náttúrulegum afurðum og sjálfbærni hafa verið í fyrirrúmi. Hún rak til að mynda fyrirtækið Kalksalt og er nú með nýtt fyrirtæki sem ber yfirskriftina Villt að vestan, og framleiðir meðal annars villisveppasósur. Sæbjörg er einnig bóndi og hefur nýlega gert það sem fáir kannski gera, keypt sér jörð undir búskaparbaslið.

Þjóðhættir er hlaðvarp sem fjallar um nýjar rannsóknir og fjölbreytta miðlun í þjóðfræði. Umsjón hafa dr. Dagrún Ósk Jónsdóttir, kennari í þjóðfræði við Háskóla Íslands og Sigurlaug Dagsdóttir, verkefnisstýra vefsins Lifandi hefðir hjá Þjóðminjasafni Íslands.