Sjálfstæðisflokkurinn rís í aðdraganda kosninga

Sjálf­stæð­is­flokk­ur­inn með Bjarna Bene­dikts­son í for­ystu er nú orð­inn stærsti flokkur lands­ins og hefur fimm pró­sentu­stiga for­skot á Vinstri græna, flokk Katrínar Jak­obs­dóttur.

Lokaspá kosn­inga­spár Baldurs Héð­ins­sonar og Kjarnans sýnir Sjálf­stæð­is­flokk­inn með 24,2 pró­sent fylgi á lands­vísu. Vinstri græn eru með 19 pró­sent. Þetta er mesta fylgi Sjálf­stæð­is­flokks­ins síðan rík­is­stjórn Sjálf­stæð­is­flokks­ins, Við­reisnar og Bjartar fram­tíðar féll 15. sept­em­ber síð­ast­lið­inn og boðað var til kosn­inga.

Fylgi Vinstri grænna hefur jafn­framt ekki verið jafn lágt í kosn­inga­spánni síðan hún var fyrst unnin í aðdrag­anda þess­ara kosn­inga 2. júlí í sumar.

Um það leyti sem Vinstri græn hófu að tapa fylgi í kosn­inga­bar­átt­unni tók fylgi Sam­fylk­ing­ar­innar að rísa af ein­hverri alvöru. Fylgi Vinstri grænna náði hámarki 10. októ­ber, fyrir rúmum tveimur vikum síðan, í 27,6 pró­sentum. Þá var Sam­fylk­ingin aðeins með 10 pró­sent en flokkur Loga Más Ein­ars­sonar hefur 14,8 pró­sent nú.

Snarpri kosn­inga­bar­áttu lauk form­lega með kapp­ræðum for­manna þeirra flokka sem bjóða fram í öllum kjör­dæmum í Rík­is­sjón­varp­inu í gær­kvöldi.

Mið­flokkur Sig­mundar Davíðs Gunn­laugs­sonar birt­ist nýr í lands­lagi íslenskra stjórn­mála um síð­ustu mán­aða­mót. Flokk­ur­inn mæld­ist strax með nokk­urt fylgi, jafn­vel þó fyrstu kann­anir hafi aðeins kannað „fylgi við fram­boð Sig­mundar Davíðs“. Sig­mundur hafði þá nýklofið sig úr Fram­sókn­ar­flokknum og veitt sínum gömlu félögum gott högg í kosn­inga­spánni.

Mið­flokk­ur­inn svo barist við að kom­ast yfir 10 pró­sentu­stigam­úr­inn og endar með 10 pró­sent í loka­spá kosn­inga­spár­innar í aðdrag­anda Alþing­is­kosn­ing­anna sem fram fara í dag.

Píratar hafa, öfugt við Mið­flokk­inn, barist við að falla ekki langt undir 10 pró­sent fylgi á und­an­förnum vikum. Fylgi flokks­ins virð­ist hafa náð nokkru jafn­vægi í um 10 pró­sent, og Píratar eru með 9,2 pró­sent í loka­spánni.

Þar á eftir kemur Fram­sókn­ar­flokk­ur­inn með 8,2 pró­sent fylgi. Það er mesta fylgi sem flokkur Sigurðar Inga Jóhanns­sonar hefur haft í kosn­inga­spánni síðan í 23. sept­em­ber síð­ast­lið­inn.

Viðreisn hefur risið að und­an­förnu. Kosn­inga­spáin sýnir flokk­inn með 7,6 pró­sent fylgi á lands­vísu. Útlitið var síður en svo bjart fyrir Benedikt Jóhann­es­son og Þorgerði Katrínu Gunn­ars­dóttur í Viðreisn framan af, eða þar til ákveðið var að Benedikt myndi stíga til hliðar sem for­maður flokks­ins og Þor­gerður Katrín myndi taka við. Síðan hefur Viðreisn mælst með sífellt meiri stuðn­ing í kosn­inga­spánni.

Björt framtíð á sér ekki viðreisnar von

Það hefur ekk­ert gengið hjá sam­starfs­flokki Við­reisnar og Sjálf­stæð­is­flokks­ins í rík­is­stjórn­inni, Bjartri fram­tíð. Flokkur Óttarrs Proppé sleit stjórn­ar­sam­starf­inu nokkuð óvænt 15. sept­em­ber. Flokk­ur­inn hafði síður en svo mælst með mikið fylgi í kosn­inga­spánni í aðdrag­anda stjórn­ar­slita, og þó stuðn­ing­ur­inn hafi auk­ist lít­il­lega strax í kjöl­farið var það skamm­góður vermir.

Björt fram­tíð er fjarri því að fá mann kjör­inn á þing í þessum Alþing­is­kosn­ingum. Flokk­ur­inn mælist með 1,6 pró­sent fylgi í loka­spá kosn­inga­spár­innar 2017. Í þing­sæta­spánni eru 89 pró­sent líkur á því að flokk­ur­inn fái engan mann kjör­inn.

Flokkur fólks­ins á einnig tak­mark­aða mögu­leika á því að fá mann kjör­inn á þing. Í þing­sæta­spánni eru 56 pró­sent líkur á því að Inga Sæland og félagar kom­ist ekki að.

Katrín Jak­obs­dóttir mun ef til vill þurfa að eiga sam­tal við fleiri en einn flokk ef hún vill mynda rík­is­stjórn að loknum kosn­ingum.

Mynd: Birgir Þór Harð­ar­son

Meirihluti tveggja flokka ólíklegur

Það er mjög ólík­legt að hægt verði að mynda meiri­hluta á Alþingi með aðkomu aðeins tveggja stjórn­mála­flokka eftir kosn­ing­arnar. Lík­leg­asta tveggja­flokka­mynstrið er sam­starf Sjálf­stæð­is­flokks­ins og Vinstri grænna. Slíkur meiri­hluti varð hins vegar aðeins til í 29 pró­sent til­vika 100.000 sýnd­ar­kosn­inga þing­sæta­spár­innar; Það eru sem­sagt 29 pró­sent líkur á að það verði mögu­legt, miðað við fyr­ir­liggj­andi gögn kosn­inga­spár­innar.

Í töfl­unni hér að neðan má sjá líkur á sam­an­lögðum þing­manna­fjölda mis­mun­andi flokka.

Síðast upp­fært 27. októ­ber 2017 kl. 23:00. Líkur á að sam­an­lagður þing­manna­fjöldi fram­boðs­lista nái meiri­hluta á þingi. Til að fá eins manns meiril­huta á Alþingi þarf sam­an­lagður fjöldi að vera 32 þing­menn. Rauða strikið í töfl­unni hér að neðan er sláin sem þarf að kom­ast yfir.

Í kosn­ing­unum hafa allir flokkar lista­bók­stafi til þess að ein­kenna sig á kjör­seðl­inum sem birt­ist kjós­endum í kjör­klef­anum. Lista­bók­stafirnir eru ekki endi­lega rök­réttir miðað við nöfn flokk­anna. Ýmsar ástæður eru fyrir því, sem rekja má mis­langt aftur í tím­ann. Lista­bók­stafir fram­boð­anna sem bjóða fram í kosn­ing­unum 2017 eru eft­ir­far­andi:

• A – Björt fram­tíð
• B – Fram­sókn­ar­flokk­ur­inn
• C – Viðreisn
• D – Sjálf­stæð­is­flokk­ur­inn
• F – Flokkur fólks­ins
• M – Mið­flokk­ur­inn
• P – Píratar
• R – Alþýðu­fylk­ingin
• S – Sam­fylk­ingin
• T – Dögun
• V – Vinstri græn

Fylgið hefur dreifst mikið á alla flokka í aðdrag­anda kosn­ing­anna.

Mynd: Birgir Þór Harð­ar­son

Kosningamiðstöðin verður úrslitatorg

Í kosn­inga­mið­stöð Kjarnans er hægt að finna nýj­ustu kosn­inga­spána, fróð­leik og fréttir um kosn­ing­arnar í dag. Þar er hægt að finna hag­nýta hlekki á mál­efni, fram­boðs­lista, sam­ræðu­torg, aðferða­fræði kosn­inga­spár­innar og margt fleira.

Ef þú ert óviss um hvar þú átt að kjósa getur þú flett þér upp í kjör­skrá hér.

Þegar úrslit kosn­ing­anna liggja fyrir á morgun mun kosn­inga­mið­stöðin breyt­ast í eins­konar úrslita­torg þar sem rýnt verður í úrslitin. Nið­ur­stöður kosn­ing­anna verða settar fram mynd­rænt til þess að bæta aðgengi almenn­ings að þeim upp­lýs­ingum.

Hægt verður að fletta upp nýjum þing­mönnum og raða saman mögu­legum þing­meiri­hlutum, svo eitt­hvað sé nefnt.

Fylgist með kosn­inga­mið­stöð­inni – og kjósum rétt!