Ný gerð rafbílsins Teslu mun renna af færibandinu í þessari viku, samkvæmt því sem Elon Musk, stofnandi og yfirmaður fyrirtækisins, skrifar á Twitter.
Tesla Model 3 er ætlað að vera framlag fyrirtækisins á hinn almenna bílamarkað. Bíllinn á að vera samkeppnishæfur við aðra millistærðar fjölskyldubíla og kosta um 35.000 bandaríska dali (rúmlega 3,5 milljónir íslenskra króna). Það er helmingi minna en Model S-bíllinn sem kom á markað um mitt ár 2012.
Model 3 er tilbúinn tveimur vikum á undan áætlunum fyrirtækisins. Musk bætti við að fyrstu 30 eintökin af nýja bílnum verði afhent í lok þessa mánaðar.
[adspot]
Fjöldi framleiddra eintaka af rafbílum Teslu eykst hratt um þessar mundir. Musk segir um það bil 100 bíla verða framleidda í ágúst og meira en 1.500 bíla í september. Í desember verði svo búið að smíða 20.000 Model 3-bíla. Meira en 400.000 pantanir hafa borist.
Model 3 er þriðja kynslóð Tesla-rafbílanna, eins og nafngiftin ber vitni um. Síðasta útgáfan, Model X, var gríðarlega flókin í framleiðslu og seinkaði afhendingu fyrsta eintaksins um 18 mánuði. Model X er lúxus-smájeppi og bauðst viðskiptavinum Tesla að velja úr miklu úrvali aukahluta sem flækti framleiðsluferlið gríðarlega.
Nýi bíllinn verður fyrsta bílgerðin undir merkjum Tesla sem framleiddur verður í miklu magni. Árið 2015 framleiddi Tesla aðeins samtals 84.000, miðað við keppinauta sína á markaði, eins og General Motors sem smíðuðu meira en 10 milljónir eintaka.
Með aukinni framleiðslu mun álagið á þjónustuhluta Tesla stækka mikið. Nú þegar hefur 30 prósent meira fjármagni verið veitt til verslana og þjónustustöðva Tesla.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir