Ingibjörg hefur áður rannsakað gæludýr, eða selskapsdýr eins og hunda og ketti, en í BA rannsókn sinni í heimspeki rannsakaði hún gæladýrahald út frá siðfræðilegu sjónarhorni. 

Í þættinum segir Ingibjörg meðal annars frá hundaskattinum sem settur var á 1859 og var ætlað að stemma stigu við sullaveiki sem algeng var hér á landi. Hún segir einnig frá hundabanninu sem gilti frá 1924-1984 í Reykjavík og fleiri þéttbýlisstöðum á Íslandi, en um þetta ríktu mjög skiptar skoðanir.

Hundamenning, hlutverk hunda og viðhorf okkar til þessara dýra hefur breyst töluvert í gegnum tíðina. Það hvað borgarmenning er ungt fyrirbæri hér á landi hefur einnig áhrif á viðhorf okkar til hundahalds í þéttbýli. 

Ingibjörg hefur einnig gert innslög um íslenska fjárhundinn fyrir Ríkisútvarpið. Innslögin voru hluti af þáttunum Sumarmál árið 2022. Ingibjörg kemur einnig aðeins inn á efni þeirra þátta hér.

Þjóðhættir er hlaðvarp sem fjallar um nýjar rannsóknir og fjölbreytta miðlun í þjóðfræði. Umsjón hafa dr. Dagrún Ósk Jónsdóttir, kennari í þjóðfræði við Háskóla Íslands og Sigurlaug Dagsdóttir, verkefnisstýra vefsins Lifandi hefðir hjá Þjóðminjasafni Íslands.