Guðrún Hafsteinsdóttir dómsmálaráðherra situr fyrir svörum í Pressu, sem sýnd er á vef Heimildarinnar í beinu streymi klukkan 12.00 á föstudögum og aðgengilegur í heild sinni að þætti loknum. Guðrún tók við embætti dómsmálaráðherra í haust og hefur síðan staðið í ströngu vegna umdeildra og flókinna mála sem heyra undir ráðuneytið.

Sem æðsti yfirmaður almannavarna hafa afleiðingar jarðhræringa á Reykjanesi, uppbygging varnargarða og rýmingaraðgerðir meðal annars lent á hennar borði rétt eins og krafa um ítarlega rannsókn á því þegar Lúðvík Pétursson féll í sprungu við vinnu sína í Grindavík. Útlendingamál eru ekki síður í deiglunni.

Tillögur Guðrúnar um lokað búsetuúrræði fyrir hælisleitendur sem andstæðingar þess kalla fangelsi, er á leið fyrir ríkisstjórn. Samhliða vaxandi og háværari krafna innan hennar eigin flokks um nauðsyn þess að hefta enn móttöku hælisleitenda hingað til lands.

Í þáttinn koma einnig almannatenglarnir Björgvin Guðmundsson og Andrés Jónsson og ræða stjórnmálaástandið, en það hugtak hefur ef til vill sjaldan átt betur við en núna. Úrskurðir umboðsmanns, yfirlýsingar einstaka stjórnarliða um samstarfsflokkana, fylgiskannanir og hveitibrauðsdagar formanns Sjálfstæðisflokksins í nýju ráðuneyti, verða rædd þar.