Umræðum í þættinum verður skipt í fernt eftir þeman og verður því töluverður gestagangur við umræðuborðið.

Við byrjum á viðtali við Óskar Hallgrímsson ljósmyndara sem frá upphafi innrásar Rússa í Úkraínu hefur skrásett átökin fyrir Heimildina. Magnea Marínósdóttir alþjóðastjórnmálafræðingur sest við umræðuborðið og fer yfir þessi átök sem og árásir Ísraelshers á Gasa-ströndina, þar sem þúsundir óbreyttra borgara hafa fallið á undanförnum vikum. 

Í næsta hluta verður sjónum beint að stríðinu við vexti og verðbólgu. Við umræðuborðið setjast þau Sigríður Margrét Oddsdóttir, framkvæmdastjóri Samtaka atvinnulífsins, og Ásgeir Brynjar Torfason, ritstjóri Vísbendingar og doktor í fjármálum. 

Víðir Reynisson, yfirlögregluþjónn almannavarna, ræðir svo um náttúrvár ársins en Grindvíkingar hafa ekki getað sofið á heimilum sínum í margar vikur vegna eldgosahættu í bænum. 

Undir lok þáttar ræðum við svo menningarstríðið við þau Drífu Snædal, talskonu Stígamóta, og doktorsnemann Bergsvein Ólafsson, sem hefur náð að fanga athygli ungra manna með hugmyndum sínum um samfélagið.