Rapparinn Kilo hefur lifað litríku lífi en alveg sama hvað hefur gengið á í hans lífi, þá hefur hann alltaf verið duglegur að rappa og gefa út plötur. Nýjasta platan hans, Heart of Gold, kom út síðastliðinn mars og hefur fengið góða dóma. Þrátt fyrir að hann sé þekktastur fyrir tónlist og skemmtilegan persónuleika á samfélagsmiðlum, þá er Kilo líka grjótharður kvikmyndaáhugamaður.

Hafsteinn fékk því Kilo í heimsókn til sín og hann tók með sér sinn topp 10 lista. Kilo kom með mjög áhugaverðan lista og strákarnir fara yfir hann saman og tala meðal annars um bíómyndina Leon, hversu góður leikari Gary Oldman er, hversu frábær Vera Farmiga er sem leikkona og hvað Suður-Kóreubúar gera góðar bíómyndir.

Þeir ræða einnig hversu fyndin Robocop er, hversu orkumikill Al Pacino er í Scarface, hversu léleg The Tax Collector er, hvort að Denzel Washington leiki alltaf hetjuna, hversu glatað það er að hafa flestallar myndir PG-13 og hvernig Orson Welles var á undan sinni samtíð með myndinni Citizen Kane.