Hamingjan
Hamingjan í flæðisástandi listamannsins
Þrándur Þórarinsson listmálari talar um að hamingjan sé boðefni í sálarfylgsninu og að það þurfi að leggja reglulega inn í gleðibankann. Hann nefnir góð áhrif hreyfingar á sálartetrið og það hvernig líðanin smitar inn í málverkin hans.
Endurheimti hamingjuna með aðstoð og breyttu hugarfari
Eva Hrund Einarsdóttir gekk á vegg fyrir mörgum árum en hún upplifði kulnun meðal annars vegna ofþjálfunar. Hún fékk alls konar hjálp til að komast yfir ástandið og endurheimta hamingjuna. „Helsti lærdómurinn var að læra að segja nei, að lifa í núinu, nýta tímann með þeim sem maður elskar sem og verja tímanum í hluti sem veita manni jákvæða orku.“
Fjallgöngur veita hamingju
Jóhanna Fríða Dalkvist segir að sér finnist að fólk geti ekki alltaf verið „sky high“; það sé ekki hamingjan að vera alltaf einhvers staðar á bleiku skýi. Hún segir að fólk þurfi að kunna og ákveða hvernig það ætli að bregðast við ef það finnur fyrir óhamingju. Það þurfi að ákveða að vinna sig út úr því og tala um hlutina. Fjallgöngur hjálpuðu Jóhönnu Fríðu í kjölfar sambandsslita á sínum tíma og síðan hefur hún gengið mikið á fjöll og er meira að segja farin að vinna sem fararstjóri í aukavinnu.
Maður varð heill
Guðmundur Andri Thorsson segir að þegar eitthvað kemur upp á í lífinu verði maður bara að standa á fætur aftur, hrista sig og halda áfram. Það að vinna úr hlutunum á jákvæðan hátt sé alltaf ákvörðun. Guðmundur Andri og eiginkona hans gátu ekki eignast barn og ákváðu því að ættleiða og eiga tvær uppkomnar dætur. Þegar hann hafi fengið eldri dótturina í fangið þá hafi hann orðið heill.
„Ég þurfti að samþykkja sjálfa mig fyrir það sem ég er“
Ingileif Friðriksdóttir var góð í að fela það hvernig henni leið í æsku. Um árabil var hún skotspónn bekkjarfélaga sinna og upplifði sig eina þótt hún ætti vinkonur. Hún þorði ekki að koma út úr skápnum en til að losna við tilfinningadoðann varð hún að horfa í spegil og finna sjálfa sig. „Það var risastórt og ótrúlega ógnvænlegt skref,“ segir Ingileif sem er nú hamingjusamlega gift. Fjölskyldan er henni allt.
Fann frelsi og hamingju við að ganga á fjöll
Hanna Gréta Pálsdóttir hefur nokkrum sinnum staðið á krossgötum í lífinu og ekki verið á þeim stað sem hún hefði viljað vera á. Hún breytti um lífsstíl fyrir um áratug og fór að ganga á fjöll. Þá fór hún að upplifa hamingjuna en það er jú sagt að göngur séu góðar fyrir líkama og sál. „Eftir 17 tíma göngu var ég ósigrandi, full af sjálfstrausti og hamingjusöm,“ segir hún um eina gönguna.
Við byggjum upp hamingju okkar með réttum ákvörðunum
Ágúst Borgþór Sverrisson, blaðamaður og rithöfundur, segir að þakklæti sé einn af hamingjulyklunum sínum og að dagleg vinnusemi sem færir afrakstur sé ein af forsendum þess að manneskja upplifi hamingju. Hann segist aldrei meðvitað hafa staðið í þeim sporum að hann teldi sig þurfa að finna hamingjuna en ómeðvitað hafi hann án nokkurs vafa leitað leiða til þess í barnæsku og verið í sérstakri þörf fyrir það þá.
Útivist og hreyfing í góðum hópi eykur lífsgleði
Harpa Stefánsdóttir hefur þurft að rækta hamingjuna á nýjan hátt síðustu ár. Þar hefur spilað stærstan þátt breytingar á fjölskyldumynstri. Hún hefur auk þess um árabil búið í tveimur löndum og segir að sitt daglega líf hafi einkennst af að hafa þurft að hafa fyrir því að sækja sér félagsskap og skapa ný tengsl fjarri sínu nánasta fólki. Harpa talar um mikilvægi hópastarfs tengt útivist og hreyfingu en hún telur að hreyfing í góðum hópi stuðli að vellíðan.
Hugrekki og dass af kæruleysi
Heiðdís Helgadóttir, hönnuður og teiknari, var með ómeðhöndlaðan athyglisbrest sem varð til þess að hún fékk ofsakvíðaköst. Hún fór í mikla sjálfsvinnu, leitaði til sálfræðings, fékk lyf og segir að hugrekki og traust sé grundvöllur hamingjunnar en líka dass af kæruleysi. Hún segir mikilvægt að vera í kringum jákvætt og gott fólk því gleðin sé besta næringin.
Lærdómurinn af því að eignast fatlað barn og skilja
Dagbjört Ásbjörnsdóttir á tvíburasyni, annar þeirra er fatlaður og upplifir hún oft hamingjuna í því sem aðrir taka sem sjálfsögðum hlut. Hún ákvað að finna hamingjuna eftir skilnað. „Ég held að ástin færi manni ekki hamingjuna; ástin bætir alltaf ofan á hamingjuna.“
Hið illa má ekki hafa yfirhöndina
Agnes M. Sigurðardóttir, biskup Íslands, talar um leitina að hamingjunni og segir ástina sterkasta aflið. Trúin hjálpar líka til og vissan um upprisuna. „Þannig vann ég mig til dæmis upp úr svartnætti lífsreynslu minnar ef ég má orða það þannig: Með því að hanga í ljósinu.“ Píslarsagan sé að endurtaka sig núna með fólkinu í Úkraínu. „Þetta er bara svo mikill hryllingur að maður á ekki til orð.“
Síða 1 af 9
Næsta síða »