Elissa Bijou og Anahita Babaei hittust fyrst á mótmælum gegn hvalveiðum við Reykjavíkurhöfn degi eftir að matvælaráðherra hafði aflétt hvalveiðibanni. Börn höfðu krítað á malbikið: „Hvalaskoðun til hægri, hvalveiðar til vinstri“. Það var þarna sem „stóra hugmyndin“, eins og Elissa orðar það, fæddist. Hugmyndin um að klifra upp í möstur hvalveiðiskipanna tveggja að næturlagi og koma þannig í veg fyrir að þau kæmust út á veiðar. Þær sáu þetta sem síðasta úrræðið til þess að koma í veg fyrir dráp á langreyðum.