„Ónýtasta ráðið þarna út er „ekki fara ósátt að sofa“,“ segir Ólafur Grétar Gunnarsson fjölskyldu- og hjónaráðgjafi í 27. hlaðvarpsþætti karlmennskunnar.

Ólafur Grétar starfar á geðsviði Landspítalans og hefur starfað lengi með verðandi og nýbökuðum feðrum. Hann brennur fyrir því að „þegar karlar eru að verða pabbar í fyrsta sinn að þeir fái að njóta þess eins mikið og lífið bíður upp á“. Hann segir að það hafi aldrei verið eins góð tækifæri til þess og á þeim tímum sem við lifum í dag. Hins vegar séu úreltar og gamaldags hugmyndir torfærur í því að feður stígi inn í foreldrahlutverkið af fullum þunga sem og harðneskjulegt kerfi s.s. stutt fæðingarorlof og of lágar greiðslur.

Ólafur Grétar hefur barist ötuttlega fyrir bættum aðbúnaði foreldra og feðra undanfarna áratugi og meðal annars haldið námskeið sem gáfu góða raun, en var lagt af eftir hrun. Ólafur Grétar vill virkja feður, styðja þá og fræða, hjálpa pörum að vinna saman að sem bestu uppeldi fyrir börnin þeirra og á sama tíma berjast fyrir betra kerfi fyrir börn og foreldra.