Hugleikur Dagsson ræðir við Hillbilly, meðal annars um mikilvægi niðurlægingarinnar, í þessum fyrsta hlaðvarpsþætti Hús&Hillbilly. Hugleikur uppgötvaði tækni til þess að breyta upplifun niðurlægingarinnar í þeim tilgangi að koma í veg fyrir að skammarleg atvik dagsins éti mann upp að innan, rétt fyrir svefninn. Gæti verið námskeið í uppsiglingu? Hillbilly þótti Hugleikur yfirvegaður, þvert á spár okkar. Það var talað um dónamörk grínsins og listnám á fágaðan hátt. Hillbilly var þó við það að gelta upp hlátri í gegnum allt viðtalið. 

Hugleikur og Hillbilly sitja á Dagsson skrifstofunni, en þar situr hann og horfir út á sjóinn þegar hann er staddur á Íslandi en hann starfar einnig í Berlín um þessar mundir. Nú sem endranær reynir Hillbilly að hafa viðtalið tímalaust - með það að markmiði að kryfja haus listamannsins - svo það skiptir ekkert miklu máli hvar hann býr.