„Við erum ennþá að fremja efnahagsbrot”

„Við erum ennþá að fremja efna­hags­brot og við erum ennþá að rann­saka slík brot. Í dag er það þó þannig að við erum með ein­ingu eða starf­semi sem ræður við að rann­saka flókin efna­hags­mál og hefur bæði mann­skap og búnað til þess.“

[links]Þetta segir Ólafur Þór Hauksson, hér­aðs­sak­sókn­ari og fyrr­ver­andi sér­stakur sak­sókn­ari, aðspurður um hvort að Íslend­ingar séu enn að fremja efna­hags­brot, eða hvort að emb­ætti hans sé enn að takast á við brot af því tagi sem áttu sér stað í aðdrag­anda banka­hruns­ins.

Þetta kom fram í við­tali Þórðar Snæs Júl­í­us­son­ar, rit­stjóra Kjarn­ans, við Ólaf í sjón­varps­þætt­inum 21 á Hring­braut á mið­viku­dag þar sem þeir ræddu hrunið og afleið­ingar þess í til­efni af því að ára­tugur er lið­inn frá atburð­unum afdrifa­ríku nú um stund­ir. Hægt er að horfa á þátt­inn í heild sinni í spil­ar­anum hér að ofan.

[adspot]Ólafur sagði að fram­ganga íslenskra rann­sókn­ar­að­ila hafi vakið umtals­verða athygli erlendis, en Ísland tók með allt öðrum hætti á grun­semdum um lög­brot í starf­semi bank­anna en nokkuð annað land í heim­inum. „Við sjáum það líka þegar við sækjum fundi erlendis að við erum nokkuð góð í því sem við erum að gera. Við höfum þó nokkuð til mál­anna að leggja varð­andi þessi atriði í dag,“ segir Ólafur.

Málin sem emb­ætti hans er að takast á í dag eru þó ann­ars eðlis en þau sem það rann­sak­aði fyrstu árin eftir að emb­ætti sér­staks sak­sókn­ara var sett á fót. Umfang þeirra sé mun minna en „trendin“ séu enn þau sömu.